تەك ۇلىبريتانياعا ەسە جىبەرىپ قويدى.
قازاقستاننىڭ جالعىز قۇراماسى پارا-حوككەيدەن (سلەدج-حوككەي) س پۋلىنداعى الەم چەمپيوناتىندا ەكىنشى ورىنعا يە بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
تۋرنيرگە قازاقستان، تايلاند، اۆستريا، ۇلىبريتانيا جانە فرانسيا كوماندالارى قاتىستى.
وتاندىق پاراسپورتشىلار ءۇشىن بۇل جوعارى حالىقارالىق دەڭگەيدەگى العاشقى جارىس. دەبيۋتتىك تۋرنيردە سپورتشىلار ءتورت ماچتا ءۇش رەت جەڭىسكە جەتتى (7:0، 10:0 جانە 9:2) جانە تۋرنير كەستەسىندە ەكىنشى ورىنعا تابان تىرەدى. تەك ۇلىبريتانياعا (0:6) ەسە جىبەرىپ قويدى.
پاراليمپيادا ويىندارىنىڭ چەمپيوناتىن ۇيىمداستىرۋشىلار قازاقستاندىق قۇرامانىڭ ويىنىنا ءتانتى بولىپ، 2-ورىن العانىنا قاراماستان، 2023 جىلى ۆ توبىندا وتەتىن كەلەسى چەمپيوناتتا ونەر كورسەتۋىنە جولداما بەردى.
«قازاقستان حالقىنا» قوعامدىق قورىنىڭ قايىرىمدىلىق جوباسى اياسىندا قازاقستاندىق قۇراماعا پارا-حوككەيدەن حالىقارالىق جارىستارعا دايىندالۋى جانە قاتىسۋى ءۇشىن سپورتتىق مۇكاممال ساتىپ الىپ بەردى. جوبا قازاقستان رەسپۋبليكاسىندا پاراليمپيادالىق حوككەيدى دامىتۋعا جانە قولداۋعا باعىتتالعان.
الەم چەمپيوناتىندا پاراسپورتشىلار قور تابىس ەتكەن 50 دانا سىرعىتپا تاياقپەن ونەر كورسەتتى. سونداي-اق، قۇراماعا 16 شانا جەتكىزىلەدى دەپ كۇتىلۋدە. بۇل ماقساتقا «قازاقستان حالقىنا» قورى 12،4 ميلليون تەڭگە باعىتتادى.
«پاراحوككەي فەدەراسياسى 2021 جىلى قۇرىلدى. باستاماشىلار مۇمكىندىگى شەكتەۋلى، تىرەك-قيمىل اپپاراتى بۇزىلعان ازاماتتار. ماقساتىمىز – اياق امپۋتاسياسى نەمەسە كەز كەلگەن باسقا دياگنوزى بار، قيىن ومىرلىك جاعدايعا تاپ بولعان ادامدارعا كومەكتەسۋ. مىسالى، سپورتشىلار اراسىندا اياعىنان ايىرىلعان كاسىبي فۋتبولشىلار بار. پارا-حوككەيگە كەلىپ، جاڭا ءومىردى باستاپ، ۇمىتكە قول جەتكىزدى دەۋگە بولادى. كوماندامىزدا 18 ادام، سونىڭ ىشىندە ءبىر قىز جانە ەكى جاتتىقتىرۋشى بار. ەڭ جاسى 17-دە، ۇلكەنى 57 جاستا. قورجىنىمىزدا جەڭىستەرىمىز دە بار»، - دەدى استانا قالاسى پارا-حوككەي فەدەراسياسىنىڭ باسشىسى قايرات سابىروۆ.
بۇعان دەيىن پاراسپورتشىلار ءتۇرلى جارىستارعا قاتىسىپ، جەتىستىكتەرگە قول جەتكىزگەن. بيىل قۇراما ومبىدا وتكەن «ءسىبىر كۋبوگى» حالىقارالىق تۋرنيرىندە كۇمىس، حانتى-مانسييسكىدەگى «بىرگەمىز. سپورت» پاراليمپياداشىلاردىڭ قىسقى ويىندارىندا قولا مەدال جەڭىپ الدى.
وتكەن جىلى سوچيدەگى «كحل كونتينەنت كۋبوگى» حوككەيدەن حالىقارالىق تۋرنيردە ءتورتىنشى ورىندى يەمدەندى. قالىپتى قىزمەت مەرزىمى نەبارى 5 جىل بولسا دا، بۇل جارىستاردا 2017 جىلى ساتىپ الىنعان مۇكاممال قولدانىلىپ كەلدى. سوندىقتان، استانا قالاسىنىڭ پارا-حوككەي فەدەراسياسى «قازاقستان حالقىنا» قورىنا جۇگىنىپ، مۇمكىندىگى شەكتەۋلى جاندارعا قولداۋ كورسەتىپ، حوككەيگە ارنالعان شانا مەن سىرعىتپا تاياق ساتىپ الۋعا كومەك سۇرادى.
«پارا-حوككەي – پاراليمپيادالىق سپورت ءتۇرى جانە ءبىز ونىڭ قازاقستانداعى دامۋ مۇمكىندىكتەرىن بايقاپ وتىرمىز. جىگىتتەرىمىزدىڭ قارقىنى ەرەكشە، جەڭۋگە دايىن. وسى ۋاقىت ىشىندە پارا-حوككەيمەن اينالىسقىسى كەلەتىن جانكۇيەرلەرىمىز بەن پىكىرلەس جانداردى تاپتىق. «قازاقستان حالقىنا» قورى ۇسىنىسىمىزعا جاۋاپ بەرىپ، مۇگەدەك سپورتشىلاردى قولداعانىنا ريزامىز. بۇل ءبىز ءۇشىن كۇشتى موتيۆاسيا، ىنتا-جىگەرىمىزدى ودان ارى ارتتىرا ءتۇستى»،- دەدى قايرات سابىروۆ.
ايماقتاردا مۇمكىندىگى شەكتەۋلى جاندارعا ارنالعان مامانداندىرىلعان مۇز سارايلارىنىڭ بولماۋىنا بايلانىستى پارا-حوككەي جەتكىلىكتى دامىماعان. ەرەكشە قاجەتتىلىكتەرى بار ادامدارعا ارنالعان جالعىز مۇز سارايى استانادا «تارلان» سپورت كەشەنىندە ورنالاسقان.
«قازاقستان حالقىنا» قورىندا سپورت مۇگەدەك ادامداردى الەۋمەتتەندىرۋدىڭ ءتيىمدى قۇرالدارىنىڭ ءبىرى ەكەنىن اتاپ ءوتتى. قور «تۇساۋ كەسەر» باعدارلاماسى اياسىندا ەرەكشە بالالارعا ارنالعان ەلىمىز بويىنشا بەس دەنە شىنىقتىرۋ-ساۋىقتىرۋ ۇيىرمەسىن اشتى. سونداي-اق، ەلىمىزدىڭ پارا-اتلەتتەرى ءۇشىن سپورتتىق-جۇگىرۋ پروتەزدەرىن جاساۋ بويىنشا قايىرىمدىلىق باعدارلاماسىن ىسكە اسىرۋدا.
قۇرامانىڭ استاناعا ورالۋى 14 جەلتوقساندا ساعات 19:30-دا جوسپارلانعان.
