ەلىمىزدىڭ جوعارى جانە جوعارى وقۋ ورنىنان كەيىنگى ءبىلىمىن دامىتۋعا قوسقان كوپ جىلعى ۇلەسى ءۇشىن احمەت بايتۇرسىنوۆ اتىنداعى وردەنمەن ءىىم الماتى اكادەمياسى ماراپاتتالدى.
مۇنداي شەشىمدى ق ر جوعارى وقۋ ورىندارى قاۋىمداستىعىنىڭ ءتورالقاسى قابىلدادى، دەپ حابارلايدى Almaty-akshamy.kz Polisia.kz-كە سىلتەمە جاساپ
ماراپاتتاۋ راسىمىندە قاۋىمداستىق پرەزيدەنتى راحمان الشانوۆ اتاپ وتكەندەي، الماتى اكادەمياسى – رەسپۋبليكاداعى وسى ماراپاتقا يە بولعان العاشقى جوعارى وقۋ ورنى. اكادەميادا اقپاراتتىق-كوممۋنيكاسيالىق تەحنولوگيالار، كريمينالدىق پوليسيا، ۇيىمداسقان قىلمىسقا، كيبەرقىلمىستارعا، ەسىرتكى بيزنەسىنە، ەكسترەميزمگە قارسى ءىس-قيمىل جانە IT-كريميناليستەر سالاسىنداعى مامانداندىرۋلار بويىنشا جوعارى، جوعارى وقۋ ورنىنان كەيىنگى جانە كاسىپتىك ءبىلىمنىڭ ءبىلىم بەرۋ باعدارلامالارى بويىنشا كادرلاردى دايارلاۋ جۇزەگە اسىرىلادى.
اكادەميانىڭ قۇقىق قورعاۋ جۇيەسى ءۇشىن كۋرسانتتان باستاپ جوعارى بۋىن باسشىلارىنا دەيىنگى كاسىبي كادرلاردى دايارلاۋ جونىندەگى كوپ جىلدىق تاجىريبەسى ءبىلىم بەرۋدىڭ جوعارى دەڭگەيى مەن ساپاسى تۋرالى نىق سەنىممەن ايتۋعا مۇمكىندىك بەرەدى. وسىنداي جوعارى ناگرادانى تابىستاۋ – ءىىم الماتى اكادەمياسىنىڭ عىلىم مەن ءبىلىمدى جانە قۇقىق قورعاۋ قىزمەتىنىڭ وزىق تاجىريبەسىن ءتيىمدى بىرىكتىرگەن جاڭا بۋىننىڭ وقۋ ورنى رەتىندە تانىلۋىنىڭ جارقىن ايعاعى.