2024 جىل قازاقستان ءۇشىن ورتالىق ازيا مەملەكەتتەرىمەن كوپجوسپارلى ىنتىماقتاستىقتى نىعايتۋ تۇرعىسىنان ماڭىزدى جىل بولدى. مەملەكەت باسشىسىنىڭ «ورتالىق ازيانىڭ رەنەسسانسى: ورنىقتى دامۋ مەن وركەندەۋ جولىندا» باعدارلامالىق ماقالاسى وڭىردەگى باۋىرلاستىق قاتىناستار مەن ستراتەگيالىق سەرىكتەستىكتىڭ جاڭا فورماتتارىن بەلگىلەدى، دەپ حابارلايدى aqshamnews.kz
ازەربايجان پرەزيدەنتى مەن بۇۇ وكىلدەرىنىڭ قاتىسۋىمەن ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋى 6-شى رەت وتكىزىلدى. سامميت قورىتىندىسى بويىنشا «وا-2040» وڭىرلىك كووپەراسيانى دامىتۋ تۇجىرىمداماسىنا جانە 2025-2027 جىلدارعا ارنالعان ونەركاسىپتىك كووپەراسيانى دامىتۋ جونىندەگى ءىس-قيمىل جوسپارىنا قول قويىلدى، بۇل ورتالىق ازياداعى ىنتىماقتاستىقتىڭ جاڭا كەزەڭىن باستادى.
قازاقستان حالىقارالىق ديپلوماتيادا ماڭىزدى ءرول اتقارۋدى جالعاستىرۋدا. استانا پروسەسى اياسىندا سيريا داعدارىسى بويىنشا كەلىسسوزدەر الاڭى ۇسىنىلىپ، ەلىمىز قاقتىعىستاردى رەتتەۋ ءۇشىن دەلدالدىق قىزمەتتەر اتقارۋدا. سونىمەن قاتار، قازاقستان وڭىرلىك قاقتىعىستاردى شەشۋ ماقساتىندا حالىقارالىق مەدياسيا ورتالىعىن قۇرۋدى ۇسىندى.
قازاقستاننىڭ ەنەرگەتيكا، كولىك، ساۋدا جانە سيفرلىق تەحنولوگيالار سالاسىنداعى ءىرى وڭىرلىك جوبالارعا باستاماشى بولۋى ەلىمىزدىڭ جاھاندىق ەكونوميكالىق بايلانىستاردى نىعايتۋعا دەگەن ۇمتىلىسىن كورسەتەدى. ترانسكاسپيي حالىقارالىق كولىك باعىتىن دامىتۋ جانە ەۋرازيالىق ەكونوميكالىق وداققا بەلسەندى قاتىسۋ ەلىمىزدىڭ سىرتقى ساياساتىنداعى باستى باعىتتار بولىپ تابىلادى. جاسىل تەحنولوگيالار مەن ەكونوميكانى دەكاربونيزاسيالاۋ جونىندەگى باعدارلامالار قازاقستاننىڭ حالىقارالىق كۇن تارتىبىندە ماڭىزدى ءرول اتقارىپ وتىر.
قازاقستان بەيبىتشىلىككە باعىتتالعان سىرتقى ساياسات ۇستانىپ، ەۋرازيالىق كەڭىستىكتە قاۋىپسىزدىك، ورنىقتى دامۋ مەن وركەندەۋدى قامتاماسىز ەتۋ ءۇشىن ەلەۋلى ۇلەس قوسۋدا. بۇۇ، دسۇ جانە باسقا دا حالىقارالىق ۇيىمداردىڭ جاھاندىق باستامالارىنا قاتىسۋ جانە جەتەكشى دەرجاۆالارمەن ستراتەگيالىق سەرىكتەستىكتى دامىتۋ قازاقستاننىڭ سىرتقى ساياساتىنىڭ نەگىزگى باسىمدىقتارى بولىپ تابىلادى.