قازاقستان 2024 جىلى ۇجىمدىق قاۋىپسىزدىك تۋرالى شارت ۇيىمى (ۇقشۇ) مەن حالىقارالىق ارالدى قۇتقارۋ قورىندا (حاقق) ءتوراعالىق ەتىپ، وڭىرلىك قاۋىپسىزدىك پەن ەكولوگيالىق تۇراقتىلىقتى قامتاماسىز ەتۋ باعىتىندا ماڭىزدى باستامالاردى كوتەردى، دەپ حابارلايدى aqshamnews.kz
ۇقشۇ-عا ءتوراعالىق ەتۋ بارىسىندا قازاقستان ترانسشەكارالىق قىلمىس، تەرروريزم جانە ەسىرتكىنىڭ زاڭسىز اينالىمىنا قارسى ءىس-قيمىلعا ەرەكشە نازار اۋداردى. 80-نەن استام ءىس-شارا وتكىزىلدى، ونىڭ ىشىندە مەملەكەت باسشىلارىنىڭ كەزدەسۋلەرى، تاقىرىپتىق دوڭگەلەك ۇستەلدەر مەن اسكەري جاتتىعۋلار ۇيىمداستىرىلدى. سونىمەن قاتار، تاجىك-اۋعان شەكاراسىن نىعايتۋ باعدارلاماسى بويىنشا 10 جىلدىق جۇمىستىڭ اياقتالۋى ماڭىزدى كەزەڭ بولدى.
حاقق ءتوراعالىعى (2024-2026) اياسىندا قازاقستان سۋ-ەنەرگەتيكالىق رەسۋرستاردى باسقارۋدىڭ ءتيىمدى مەحانيزمىن ازىرلەۋگە جانە ەكولوگيالىق باعدارلامالاردىڭ ساپالى ىسكە اسىرىلۋىنا باسا نازار اۋداردى. سونىمەن بىرگە كليماتتىڭ وزگەرۋىنىڭ تەرىس سالدارىن جەڭىلدەتۋ ءۇشىن حالىقارالىق ىنتىماقتاستىقتى نىعايتۋ جۇمىستارى جۇرگىزىلدى.
سۋ ديپلوماتياسى بويىنشا دا قازاقستان ۇلكەن جەتىستىكتەرگە قول جەتكىزدى. 2024 جىلى جۇڭگو، رەسەي جانە ورتالىق ازيا ەلدەرىمەن ترانسشەكارالىق وزەندەر بويىنشا 35-كە جۋىق كەلىسسوزدەر ءوتتى. قىرعىزستان مەن وزبەكستانمەن شۋ، تالاس جانە سىرداريا وزەندەرى بويىنشا سۋ الۋ تۋرالى كەلىسىمدەرگە قول جەتكىزىلدى. قىتايمەن ەرتىس جانە ىلە وزەندەرى بويىنشا دا كەلىسسوزدەر جۇرگىزىلۋدە. قازاقستاننىڭ بۇۇ-نىڭ حالىقارالىق سۋ اعىندارىن كەمە قاتىناسىنان باسقا پايدالانۋ تۇرلەرىنىڭ قۇقىعى تۋرالى كونۆەنسياسىنا قوسىلۋى دا سۋ رەسۋرستارىن ءتيىمدى پايدالانۋ باعىتىندا ماڭىزدى قادام بولىپ تابىلادى.
قازاقستاننىڭ وسى باستامالارى وڭىرلىك جانە حالىقارالىق دەڭگەيدە ەكولوگيالىق جانە قاۋىپسىزدىك ماسەلەلەرىن شەشۋدە ماڭىزدى ءرول اتقارادى.