39 مىڭنان استام ادام – بۇل ونەركاسىپ جانە قۇرىلىس مينيسترلىگى جەتەكشىلىك ەتەتىن سالالار بويىنشا كادرلارعا دەگەن قاجەتتىلىك. بۇل دەرەكتەردى مينيستر قانات شارلاپايەۆ ۇكىمەت وتىرىسىندا ايتتى.
ونىڭ ايتۋىنشا، ەڭ ۇلكەن تاپشىلىق قۇرىلىس پەن سۋمەن جابدىقتاۋدا (17 مىڭنان استام مامان قاجەت)، سونداي-اق وڭدەۋ ونەركاسىبىندە (6،8 مىڭ)، مەتاللۋرگيادا جانە تاۋ-كەن وندىرىسىندە (4،6 مىڭ) بايقالادى.
اتالعان ماسەلەنى شەشۋ ءۇشىن جاڭا ماماندىقتار اتلاسىنا 75 جاڭا ماماندىق ەنگىزىلدى. مىسالى، روبوتتاندىرىلعان تاۋ-كەن تەحنيكاسىنىڭ وپەراتورى، ۆيرتۋالدى پروتوتيپتەۋ جونىندەگى مامان جانە «اقىلدى ءۇي» جوبالاۋشىسى. بيزنەس-پروسەستەردى اۆتوماتتاندىرۋ ۇدەرىسىندە 40-تان استام ماماندىق تۇرلەندىرىلدى.
بيىل يندۋستريالاندىرۋ كارتاسىنىڭ 190 جوباسى شەڭبەرىندە ماشينا جاساۋدا 8 جاڭا ماماندىق پايدا بولادى: 3D-باسىپ شىعارۋ جانە دانەكەرلەۋ جونىندەگى ينجەنەر، روبوتتاندىرىلعان بوياۋ جۇيەلەرىنىڭ وپەراتورى جانە باسقالارى بار. ولار الماتى مەن قوستانايداعى نەگىزگى وندىرىستىك جوبالاردا جۇمىس ىستەيتىن بولادى.
336 كاسىپتى قامتيتىن سەگىز سالادا جاساندى ينتەللەكت تەحنولوگيالارىن قولدانا وتىرىپ، 60 كاسىپتىك ستاندارتتاردى ازىرلەۋ جانە وزەكتەندىرۋ بويىنشا جۇمىس جۇرگىزىلۋدە.
ونەركاسىپ سالاسىندا دۋالدى وقىتۋدى پايدالانا وتىرىپ، كادر دايارلاۋ 284 كوللەدجدە جۇرگىزىلەدى، 700-دەن استام كاسىپورىن جۇمىلدىرىلعان. شارتتار مەن مەموراندۋمدار شەڭبەرىندە ولار 30-دان استام ءبىلىم بەرۋ باعدارلاماسىن ىسكە اسىرۋدا. جىل سايىن 13 مىڭنان استام جاس مامان تۇراقتى جۇمىسپەن قامتاماسىز ەتىلەدى.
گەولوگ ماماندىعىن دارىپتەۋ ماقساتىندا «جاس گەولوگ» قوعامدىق قورى قۇرىلدى، «ەڭبەك سىڭىرگەن گەولوگ» ناگراداسى ۆەدومستۆولىقتان مەملەكەتتىك مارتەبەگە قايتا اۋىستىرىلدى. قۇرىلىس سالاسىندا دا جۇمىس جۇرگىزىلۋدە.
2019 جىلدان باستاپ وتباسى بانكى جۇمىسشىلاردى قولجەتىمدى باسپانامەن قامتاماسىز ەتۋ جونىندەگى كورپوراتيۆتىك باعدارلامانى ىسكە اسىرۋدا. سوڭعى 2 جىلدا كاسىپورىنداردىڭ 122 قىزمەتكەرى پاتەر كىلتىنە يە بولدى. اۋىلدان كادرلاردىڭ كەتۋىن ازايتۋ ءۇشىن ءوز قىزمەتكەرلەرىنە تۇرعىن ءۇي سالعان جۇمىس بەرۋشىلەردىڭ شىعىندارى سۋبسيديالانادى. سونىمەن قاتار 400-دەن استام مامان «قازاقستاننىڭ قۇرىلىس سالۋشىلار قاۋىمداستىعى» جانە BI University بىلىكتىلىكتى ارتتىرۋ كۋرستارىنان ءوتتى. وتكەن جىلى WorldSkills Kazakhstan چەمپيوناتىندا 108 جەڭىمپاز ەلىمىزدىڭ جەتەكشى كومپانيالارىنان جۇمىسقا ورنالاسۋ تۋرالى ۇسىنىستار الدى.