قازاقستاننىڭ مادەني كۇندەرى وزبەكستاندا ءوتىپ جاتىر

شارا اياسىندا قازاق كينوسىنىڭ كۇندەرى وتەدى.

تاشكەنت قالاسىنداعى «تۇركىستان» ونەر سارايىندا قازاقستاننىڭ مادەنيەت كۇندەرىنىڭ اشىلۋ سالتاناتى ءوتتى، دەپ حابارلايدى Almaty-akshamy.kz

وزبەكستاننىڭ مادەنيەت جانە تۋريزم مينيسترلىگىنىڭ حابارلاۋىنشا، اشىلۋ سالتاناتىندا روزا باعلانوۆا اتىنداعى «قازاقكونسەرت» مەملەكەتتىك مەكەمەسىنىڭ شىعارماشىلىق توبىنىڭ كونسەرتتىك باعدارلاماسى بولدى.

مادەني شارانىڭ اشىلۋ سالتاناتىنا مادەنيەت جانە سپورت ءمينيسترىنىڭ ورىنباسارى نۇرقيسا داۋەشوۆ پەن وزبەكستان رەسپۋبليكاسىنىڭ مادەنيەت جانە تۋريزم ءمينيسترى وزودبەك نازاربەكوۆ قاتىستى.

كونسەرتتىك باعدارلامادا قازاقستان رەپۋبليكاسىنىڭ ەڭبەك سىڭىرگەن قايراتكەرى الىشەر كارىموۆ، رۋحيا بايدۇكەنوۆا، ءمادي سىزدىقوۆ، «گۇلدەر» ءانسامبلى، «تۇران» فولكلورلىق-ەتنوگرافيالىق انسامبلدەرى ونەر كورسەتتى.

سونىمەن قاتار تاشكەنتتە قازاق كينوسىنىڭ كۇندەرى وتەدى. ونىڭ اياسىندا الىشەر ناۋاي اتىنداعى كينوتەاتر زالدارىندا «سۇلتان بەيبارىس»، «مۇقاعالي»، «دوس-مۇقاسان»، «ۆرەميا پاتريوتوۆ»، «پاراليمپياداشى»، «نا ستارتە»، «لەتو 1941 گودا» كوركەم فيلمدەرى، «كەنجە قىز»، «بەسىك جىرى»، «امەن اعانىڭ عاجايىپ بايتەرەگى» مۋلتفيلمدەرى كورسەتىلەدى.