قازاقستان ەكونوميكاسى سەنىمدى ءوسۋ قارقىنىن كورسەتىپ، پاندەمياعا ءساتتى بەيىمدەلدى.
ساراپشىلاردىڭ ايتۋىنشا، بۇگىنگى تاڭدا كورسەتكىش پاندەمياعا دەيىنگى دەڭگەيگە جەتتى. بيىلعى 11 ايدىڭ قورىتىندىسى بويىنشا، ءجىو 3،8% ءوستى، دەپ حابارلايدى Almaty-akshamy.kz
قاڭتار-قازان ايلارىندا ەلدىڭ سىرتقى ساۋدا اينالىمى 82 ملرد دوللاردان استى. بۇل كورسەتكىش 2020 جىلدىڭ سايكەس كەزەڭىمەن سالىستىرعاندا 14% ارتىق. سونداي-اق ەكسپورت كولەمى 49 ملرد دوللاردان اسىپ، 23،5% سەنىمدى ءوسىم كورسەتتى.
«بارلىق سالا بويىنشا وڭ ديناميكانى بايقاپ وتىرمىز. وڭدەۋ ونەركاسىبى، ەلەكترمەن، سۋمەن جابدىقتاۋ جوعارى ءوسۋ قارقىنىن كورسەتىپ وتىر. سونداي-اق بىزدە اقپارات پەن بايلانىس سالاسى دا ايتارلىقتاي ءوسىم كورسەتتى. ال ساۋدا قايتا قالپىنا كەلىپ، سەرپىندى ءوسىم كورسەتۋدە. قۇرىلىس سالاسىندا دا ءوسىم بايقالىپ تۇر»، - دەيدى ق ر ۇەم ماكروەكونوميكالىق تالداۋ جانە بولجامداۋ دەپارتامەنتى باسقارماسىنىڭ باسشىسى قالىبەك ماعزۇم.
2021 جىلى ناقتى سەكتوردىڭ ءوسۋى، ساۋدانىڭ دامۋى، جوعارى ينۆەستيسيالىق بەلسەندىلىك قازاقستان ەكونوميكاسىنىڭ سەنىمدى دامۋىنىڭ فاكتورىنا اينالدى. بيىلعى جىلى كاپيتال سالىمدارى نەگىزىنەن قۇرىلىس، وڭدەۋ ونەركاسىبى، اۋىل شارۋاشىلىعى جانە ساۋدا سياقتى سالالارعا باعىتتالدى.
«ينۆەستيسيالار بويىنشا سوڭعى 2 ايدا ءوسىم وڭ ديناميكا كورسەتىپ وتىر. ءقازىر ءوسىم 2،6% قۇرايدى. بۇل جەردە ءبىزدىڭ ءوندىرۋشى ەمەس سالاداعى ينۆەستيسيالاردىڭ ءوسىپ كەلە جاتقانىن اتاپ ءوتۋ كەرەك. جالپى العاندا تاۋ-كەن ءوندىرۋ سالاسىن قوسپاعاندا، ءوسىم 17،1% قۇرادى. ەكونوميكانىڭ بەلسەندى ءوسۋ فاكتورلارىنىڭ ءبىرى وسى»، - دەدى ق ر ۇەم ماكروەكونوميكالىق تالداۋ جانە بولجامداۋ دەپارتامەنتى باسقارماسىنىڭ باسشىسى قالىبەك ماعزۇم.