كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا بىردەن ەكى اۋرۋدى - جۇرەك ىرعاعىنىڭ بۇزىلۋلارىن جانە جۇرەكتىڭ كەمىستىگىن ەمدەۋگە باعىتتالعان اشىق جۇرەككە كريوابلياسيا وپەراسياسى جاسالدى، دەپ حابارلايدى Almaty-akshamy.kz
كريوابلياسيا بۇگىندە تەك قانا كارديولوگيا جانە ىشكى اۋرۋلار عزي-دا جاسالادى. وپەراسيا ۇستەلىندەگى كەزەكتى پاسيەنت - 64 جاستاعى ايەل. ول الداعى جاڭا جىلدا ادەتتەگى قالىپتى ومىرىنە ورالا الادى. تولىقتاي وڭالتۋ ءبىر ايعا جۋىق ۋاقىتتى الادى. جاساندى قان اينالىم زەرتحاناسى مەن وپەراسيا بلوگى بار كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتايەۆتىڭ ايتۋىنشا، كريوابلياسيا – زاماناۋي جانە سەنىمدى تەحنولوگيالاردىڭ ءبىرى.
«جۇرەكتىڭ قاقپاقشالىق كەمىستىگىنىڭ سالدارىنان كوبىنە جۇرەك ىرعاعى بۇزىلادى. بۇگىنگى تاڭدا ءبىز جۇرەك ىرعاعىنىڭ بۇزىلىسىن ەمدەۋ ءۇشىن جاڭا تەحنولوگيا – كريوابلاسيانى پايدالانامىز. بۇعان دەيىن جىلۋ ەنەرگياسىن پايدالانساق، بۇگىندە مەديسينالىق ازوت پەن سۋىق ەنەرگيانى پايدالانامىز. بىزدە وسىنداي وپەراسيالار جاساۋدىڭ تاجىريبەسى بار جانە ولاردىڭ قانداي جاقسى ناتيجە بەرەتىنىن كورىپ وتىرمىز، ال ارالاسۋدان كەيىن پاسيەنتتە تۇراقتى ىرعاق قالىپتاسىپ، ساقتالادى»، – دەيدى دارىگەر.
كريوابلياسيا جاساۋ ءۇشىن كورسەتكىشتەرگە پاروكسيزمالدى نەمەسە تۇراقتى نىسانداعى بولسىن، جۇرەكتىڭ قاقپاقشالى كەمىستىگى مەن ىرعاعىنىڭ بۇزىلۋى جاتادى. قارسى كورسەتكىشتەر جوق، ءتىپتى ترومب بولعان جاعدايدا حيرۋرگتار ارالاسادى دا، ونى الىپ تاستايدى. سونىمەن بىرگە، كريوابلياسيا ترومبوەمبوليالىق اسقىنۋلار مەن ينسۋلتتاردىڭ الدىن الۋعا كومەكتەسەدى. بۇل دارىگەردىڭ پىكىرىنشە، ينسۋلتتەردىڭ شامامەن 80%-ى جۇرەك ىرعاعىنىڭ بۇزىلۋى سەبەبىنەن بولادى. وپەراسيا 4-5 ساعاتقا سوزىلادى. قازاقستاندىقتارعا مەديسينالىق ساقتاندىرۋ قورى ەسەبىنەن وپەراسيا تەگىن جاسالاتىنىن ايتا كەتۋ كەرەك.
«بارلىق ەم-شارالاردى ءبىز ءبىر وپەراسيا كەزىندە جاسايمىز، وسىدان كەيىن پاسيەنتتىڭ جۇرەك ىرعاعى قالپىنا كەلىپ، جىلدام ساۋىعىپ، وپەراسيانىڭ اسەرىن ەرتە سەزىنەدى. ويتكەنى جۇرەك دۇرىس جيىرىلا باستاعاندىقتان، ءارى قاراي جۇرەك تىنىندە قوسىمشا قايتالاما وزگەرىستەر بولمايدى»، – دەپ ءتۇسىندىردى رۇستەم تولەۋتايەۆ.
دارىگەردىڭ ايتۋىنشا، الدىڭعى حيرۋرگيالىق ارالاسۋلار ءتيىستى ناتيجەلەر بەرمەي، سودان كەيىن پاسيەنتكە كريوابلاسيا جاسالىپ، جاقسى ناتيجەلەر بولعان. كريوابلاسيا پاسيەنتكە قاي ءادىس ساي كەلۋىنە بايلانىستى ستاندارتتى ءادىس اشىق جۇرەكتە دە، سونىمەن قاتار از ءينۆازيۆتى ادىسپەن دە ىسكە اسىرىلۋى مۇمكىن. بۇل جاعدايدا 64 جاستاعى پاسيەنتكە لاپاروسكوپيامەن وپەراسيا جاساۋ مۇمكىن بولمادى دەيدى دارىگەرلەر. وڭالتۋ شاراسى مەيلىنشە قىسقا ۋاقىتتى الادى.
«وسىلايشا، ەرتە وڭالتۋ كەزەڭى ءبىر اپتا ىشىندە وتەدى، ال ءبىر ايدان كەيىن پاسيەنت كلينيكاعا وڭالتۋدىڭ ەكىنشى كەزەڭىنە قايتىپ كەلەدى. وڭ ناتيجەسى ءبىر ايدان كەيىن-اق بىلىنە باستايدى، ياعني ناۋقاستىڭ ءال-اۋقاتى جاقسارىپ جانە دارىگەرگە كەلەتىندەي سيمپتومدارى بولمايدى. وسىعان كوڭىل اۋدارۋ قاجەت. ەگەر ادام ەنتىگۋ، شارشاۋ، جۇرەكتىڭ اۋىرۋى مەن ءىسىنۋ سەكىلدى بەلگىلەردى بايقايتىن بولسا، ساق بولۋى ءتيىس»، – دەيدى دارىگەر.
ونىڭ ايتۋىنشا، سيمپتومداردىڭ پايدا بولۋىن كۇتۋگە بولمايدى، پروفيلاكتيكا ءۇشىن جىل سايىنعى سكرينينگتەن ءوتۋ كەرەك، ول اۋىرۋ پايدا بولسا، ەرتە انىقتاۋعا مۇمكىندىك بەرەدى. اۋرۋ قانشالىقتى ەرتە انىقتالسا، ونى ەمدەۋ سونشالىقتى جەڭىل بولادى.