جوو بىتىرگەن تۇلەكتەر قوسىمشا تەستىلەۋدەن ءوتۋى ءتيىس.
قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ ۇستاز ماماندىعىن تاڭداعان جاس تۇلەكتەرگە قويىلعان تالاپتار تۋرالى ايتتى، دەپ حابارلايدى Almaty-akshamy.kz.
«وسىعان دەيىن مۇعالىمدەردى كونكۋرس ارقىلى جۇمىسقا قابىلداۋدىڭ جاڭا جۇيەسى جايىندا پوست جاريالاعانمىن. ونداعى تالاپتاردىڭ ءبىرى - پەداگوگ قىزمەتىنە العاش كىرىسكەلى تۇرعان ماماندارعا مىندەتتى بىلىكتىلىك تەستىلەۋدەن ءوتۋ. وسى جازبامدا سول تالاپتار تۋرالى تولىعىراق توقتالامىن»، - دەپ جازدى مينيستر Facebook پاراقشاسىندا.
ءمينيستردىڭ ايتۋىنشا، 2021 جىلى العاش رەت پەداگوگيكالىق باعىتتا ءبىلىم العان 32 مىڭ تۇلەك تەستىلەۋدەن وتكەن.
«تەستىلەۋ پيلوتتى تۇردە ءوتتى. ءبىراق ەندى جاڭا ەرەجەلەردى قابىلداعاننان كەيىن، بيىلدان باستاپ تۇلەكتەرگە مەكتەپكە جۇمىسقا ورنالاسۋ ءۇشىن پەداگوگيكالىق جوعارى ءبىلىمى تۋرالى ديپلومىنىڭ بولۋى جەتكىلىكسىز. ەندى قوسىمشا تەستىلەۋدەن ءوتۋ ارقىلى «پەداگوگ» بىلىكتىلىگىن الۋعا مىندەتتى. بۇل قالاي جۇزەگە اسىرىلادى؟ ءبارى وتە قاراپايىم»، - دەيدى اسحات ايماعامبەتوۆ.
ءمينيستردىڭ سوزىنە جۇگىنسەك، ءتورت جىل بويى ماتەماتيكا ءمۇعالىمى ماماندىعىن وقىعان ستۋدەنت مەكتەپكە جۇمىسقا ورنالاسۋى ءۇشىن ۇلتتىق بىلىكتىلىك تەستىن تاپسىراتىن بولادى. تەستىلەۋ سۇراقتارىندا ماتەماتيكا بويىنشا مەكتەپ باعدارلاماسى مەن سول ءپان بويىنشا ساباق بەرۋ ادىستەمەسى قامتىلادى. جوعارى وقۋ ورنىندا شىن مانىندە ءتورت كۋرس وقىپ، قاجەتتى ءبىلىم العان ستۋدەنتتەرگە تەست تاپسىرۋ قيىندىق تۋدىرمايدى.
«ال ءبىرقاتار سەبەپتەرمەن ءبىلىمى مەن قابىلەتى بالالارىمىزدى وقىتۋعا جەتكىلىكسىز تۇلەكتەر ءبىلىم بەرۋ ۇيىمدارىنا قابىلدانبايدى. بىزگە سان ەمەس، ساپا ماڭىزدى. ءتيىستى دەڭگەيدە ءبىلىمى جوق تۇلەكتەر بالالارمەن جۇمىس ىستەمەۋى كەرەك»، - دەيدى اسحات ايماعامبەتوۆ.
سونىمەن قاتار مينيستر 2021 جىلعى پيلوتتىق جوبانىڭ ناتيجەلەرى تۋرالى جازدى.
«بولاشاق پەداگوگتەردى العاش رەت تەستىلەۋ كوپتەگەن جوعارى وقۋ ورىندارى ءۇشىن ۇلكەن سىناق بولدى. باستاپقىدا بەلگىلەنگەن شەكتى دەڭگەيدى ايتارلىقتاي تومەندەتكەنىمىزگە قاراماستان، تۇلەكتەردىڭ 46 پايىزى عانا قاجەتتى بالل جيناي العانىن ايتا كەتكەن ءجون. بۇل - تەست تاپسىرعان 32 مىڭ تۇلەكتىڭ 15 مىڭى عانا. اقپارات رەتىندە ايتا كەتەيىن، جىل سايىن ءبىلىم بەرۋ ۇيىمدارىنا 12-14 مىڭعا جۋىق پەداگوگ جۇمىسقا ورنالاسادى. ياعني، بۇل شارا ءمۇعالىم تاپشىلىعىنا ايتارلىقتاي اسەر ەتپەيدى. بارىنەن بۇرىن مۇنداي ناتيجە جوعارى وقۋ ورىندارىن ليسەنزياسىنان ايىرۋ، پروفيلدەۋ، ءبىلىم بەرۋ باعدارلامالارىن جاڭارتۋ جانە باسقا دا باستامالار بويىنشا مينيسترلىكتىڭ قابىلداپ جاتقان شارالارىنىڭ قاجەت ءارى دۇرىس ەكەنىن ايقىن كورسەتىپ وتىر»، - دەپ جازدى مينيستر.
اسحات ايماعامبەتوۆ بۇعان دەيىن پەداگوگتەردى ەلىمىزدىڭ 86 جوعارى وقۋ ورنى دايارلاعانىن اتتى. مينيسترلىك اتقارعان جۇمىستىڭ ناتيجەسىندە 30-دان استام جوو-نىڭ پەداگوگيكا بويىنشا ليسەنزياسى قايتارىپ الىنعان.
«ءبىراق، سونىڭ وزىندە ءالى 50-دەن استام جوعارى وقۋ ورنىنىڭ ليسەنزياسى بار، ولار پەداگوگتەردى دايارلاۋدى جالعاستىرىپ جاتىر. بارلىق ماسەلە ولاردىڭ كەيبىرىنىڭ ناتيجەلەرى وقىتۋ ساپاسىنا قويىلاتىن تالاپتارعا سايكەس كەلمەيتىندىگىندە. وسىعان بايلانىستى الداعى ۋاقىتتا دا ەلىمىزدە كادرلار دايارلاۋ ساپاسىن جاقسارتۋ ءۇشىن قاجەتتى شارالاردى قابىلدايتىن بولامىز، اسىرەسە، پەداگوگيكالىق باعىتتا. ەندى نەگىزگى ترەند انىقتالىپ، پەداگوگ ماماندىعى مەكتەپ تۇلەكتەرى ءۇشىن قىزىقتى بولا باستاعان كەزدە، بىزگە بولاشاق مۇعالىمدەردى جوعارى ساپادا دايارلاۋدى قامتاماسىز ەتۋ وتە ماڭىزدى»، - دەپ جازدى مينيستر.