سوڭعى ءتورت ايدا ەل ەكونوميكاسى 6%-عا ءوستى. بۇل تۋرالى ۇلتتىق ەكونوميكا مينيسترلىگى حابارلادى. وسىمگە كولىك، ساۋدا، ونەركاسىپ، اۋىل شارۋاشىلىعى جانە بايلانىس سالالارىنداعى وڭ سەرپىن اسەر ەتتى.
كولىك سەكتورى ەڭ جوعارى ناتيجە كورسەتتى – ءوسىم 22%. تۇركىستان، جامبىل جانە اباي وبلىستارى كوش باستادى. قۇرىلىس سالاسىندا ناقتى جۇمىس كولەمىنىڭ ءوسىمى – 16%.
ساۋدا سالاسى دا العا ىلگەرىلەدى: كوتەرمە ساۋدا – 7%، بولشەك – 6% ءوستى. تۇركىستان وبلىسى – جەمىس، كوكونىس، فارماسيەۆتيكا، اقمولا – استىق پەن مال ازىعى، شىمكەنت – مەتالل سىنىقتارى ساۋداسىنان الدا.
ونەركاسىپتەگى ءوسىم – 6%. ونىڭ ىشىندە وڭدەۋ ونەركاسىبى – 7%، تاماق ءوندىرىسى – 12%، تەمەكى – 26%، حيميا مەن ماشينا جاساۋ – 11%. اۋىل شارۋاشىلىعى 3،9% ءوسىم كورسەتتى. ساراپشىلار قيىن كليماتتىق جاعدايلارعا قاراماستان بۇل وڭ كورسەتكىش ەكەنىن ايتادى.
ماماندار پىكىرى: ەكونوميكا تەك ساندارمەن ەمەس، ساپامەن باعالانۋى كەرەك. حالىق ءوسىمدى ناقتى سەزىنۋى ءتيىس.
الدا تۇرعان باستى مىندەت – وسى قارقىندى ساقتاپ، ساپالى دامۋعا كوشۋ.