قازاقستاننىڭ بىتىمگەرلەرى ءتىل ۇيرەنىپ جاتىر

67 وفيسەر مەن سەرجانت وقۋعا كىرىستى.

الماتى قالاسىنداعى قورعانىس مينيسترلىگىنىڭ بىتىمگەرلىك دايىندىق ورتالىعىندا تىلدىك دايىندىق كۋرسى قارقىندى وتكىزىلۋدە. قازاقستان قارۋلى كۇشتەرىنىڭ 67 وفيسەرى مەن سەرجانتتارى وقۋعا كىرىستى، دەپ حابارلايدى Almaty-akshamy.kz.

«التى اي ىشىندە تىڭداۋشىلار ۇلتتىق بىتىمگەرشىلىك كونتينگەنتى قۇرامىندا، سونداي-اق بۇۇ شتابتىق وفيسەرلەرى مەن اسكەري بايقاۋشىلارى رەتىندە مىندەتتەردى جاقسى اتقارۋ ءۇشىن قاجەتتى دەڭگەيدە اعىلشىن ءتىلىن ۇيرەنۋى ءتيىس»، - دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.

كۋرستىڭ وقۋ باعدارلاماسى اقش اسكەري ءتىل ينستيتۋتىنىڭ ادىستەمەسىنە سۇيەنىپ دايىندالعان. بۇل رەتتە ستۋدەنتتەردىڭ سويلەۋ داعدىلارىن جانە اۋىزشا سويلەۋىن قالىپتاستىرۋعا، وقۋ مەن جازۋ ماشىقتارىن دامىتۋعا نەگىزگى كۇش-جىگەر جۇمسالادى.

«كۋرستى جاقسى مەڭگەرۋگە ورتالىقتا بارلىق قاجەتتى جاعدايلار جاسالعان. سونىمەن قاتار وقۋ ۇردىسىنە تىڭداۋشىلاردىڭ وزدەرىن بەلسەندى تۇردە تارتۋ جانە ءوز بەتىنشە دايىندىق ماڭىزدى»، – دەدى بىتىمگەرلىك دايىندىق ورتالىعىنىڭ باستىعى، پولكوۆنيك باۋىرجان نىعمەتۋللين.

اسكەري قىزمەتشىلەر كۋرسقا قابىلدانۋ ءۇشىن تەستىلەۋدەن وتكەن سوڭ، دايىندىق دەڭگەيىنە قاراي توپتارعا بولىنەدى. ورتالىقتىڭ وقىتۋشىلارى ءتىلدىڭ باستاپقى دەڭگەيىن مەڭگەرگەن اسكەري قىزمەتشىلەرگە ارنايى كىرىسپە كۋرسىن ازىرلەدى.