ەكى ەل اراسىنداعى ىنتىماقتاستىقتى كەڭەيتۋ جولدارىن تالقىلادى.
مەملەكەت باسشىسى قاسىم-جومارت توقايەۆ قازان كرەملىن ارالاپ كورگەننەن كەيىن تاتارستان رەسپۋبليكاسىنىڭ پرەزيدەنتى رۋستام ميننيحانوۆپەن كەزدەسۋ وتكىزدى. كەزدەسۋدىڭ الدىندا قازاقستان پرەزيدەنتى «قۇرمەتتى قوناقتار كىتابىنا» قولتاڭبا قالدىردى، دەپ حابارلايدى Almaty-akshamy اقوردا cىلتەمە جاساپ.
قاسىم-جومارت توقايەۆ پەن رۋستام ميننيحانوۆ ساۋدا-ەكونوميكالىق، ينۆەستيسيالىق جانە مادەني-گۋمانيتارلىق سالالار بويىنشا قازاقستان مەن تاتارستان اراسىنداعى ىنتىماقتاستىقتى كەڭەيتۋ جولدارىن تالقىلادى.
قازاقستان پرەزيدەنتى مىڭجىلدىق تاريحىمەن، باي مادەني مۇرالارىمەن تانىلعان تاتارستانعا ساپارمەن كەلۋگە شاقىرعانى ءۇشىن رۋستام ميننيحانوۆقا العىس ايتتى.
«مۇندا قازاقستان پرەزيدەنتى رەتىندە كەلگەنىمە وتە قۋانىشتىمىن. سىزبەن ەلىمىزدە بىرنەشە رەت كەزدەستىم. ءبىز كوپتەگەن ماسەلە تۋرالى، سونىڭ ىشىندە قازاقستان مەن تاتارستان اراسىنداعى ىنتىماقتاستىقتى دامىتۋ جانە نىعايتۋ جونىندە سويلەستىك. ەكىجاقتى ىنتىماقتاستىققا نەگىزدەلگەن ماڭىزدى جوبالارىمىز بار. ەگەر قازاقستان مەن تاتارستان باسشىلارى ساياسي ەرىك-جىگەر تانىتاتىن بولسا، بۇل جوبالاردىڭ جۇزەگە اسىرىلاتىنى ءسوزسىز»، – دەدى مەملەكەت باسشىسى.
قاسىم-جومارت توقايەۆ رۋستام ميننيحانوۆقا كەشە ماسكەۋدە رەسەي پرەزيدەنتى ۆلاديمير پۋتينمەن جۇرگىزگەن تابىستى كەلىسسوزى تۋرالى مالىمەت بەردى.
«كەلىسسوزدىڭ مازمۇنىنا، كەزدەسۋ ناتيجەلەرىنە كوڭىلىم تولدى. ءبىز، ارينە، رەسەي فەدەراسياسىنىڭ سۋبەكتىسى رەتىندە تاتارستانمەن اراداعى ىنتىماقتاستىقتى قازاقستاننىڭ دامىتا بەرەتىنى جونىندە دە اڭگىمەلەستىك. ۆلاديمير پۋتين باسپا ءسوز ءماسليحاتىندا سويلەگەن سوزىندە رەسەي فەدەراسياسىنىڭ قارقىندى دامىپ كەلە جاتقان سۋبەكتىلەرىنىڭ ءبىرى تاتارستانعا ەرەكشە توقتالدى جانە وسى رەسپۋبليكاعا جۇمىس ساپارىمەن بارۋ جونىندەگى شەشىمىمدى قولدادى»، – دەدى قاسىم-جومارت توقايەۆ.
مەملەكەت باسشىسى قازاقستان مەن تاتارستان اراسىنداعى مادەني-گۋمانيتارلىق بايلانىستاردى دامىتۋدىڭ ماڭىزدى ەكەنىن اتاپ ءوتتى.
«شىن مانىندە، ەلدەرىمىز اراسىنداعى بايلانىستاردىڭ تاريحى تەرەڭ. تاريحىمىز – ورتاق. بۇل تاقىرىپتا جازىلعان ماقالالار مەن كىتاپتاردى قىزىعا وقيمىن. وقىعان سايىن تاريحي بايلانىستارىمىزدىڭ سونشالىقتى تەرەڭ ءارى ساباقتاسىپ جاتقانىنا كوز جەتكىزەمىن، ءتىپتى تاڭ قالامىن. مادەني-گۋمانيتارلىق ىنتىماقتاستىقتى مىندەتتى تۇردە دامىتۋ كەرەك دەگەن پىكىرىڭىزدى قولدايمىن. قازاقستان بۇعان دايىن»، – دەدى قازاقستان پرەزيدەنتى.
قاسىم-جومارت توقايەۆ رۋستام ميننيحانوۆتىڭ مىقتى ءارى بەدەلدى باسشىلىعىمەن تاتارستاننىڭ قارقىندى دامىپ كەلە جاتقانىن جوعارى باعالاپ، رەسپۋبليكا حالقىنىڭ يگىلىگى جولىنداعى قىزمەتىنە تابىس تىلەدى.
تاتارستان پرەزيدەنتى قازان قالاسىنا ساپارمەن كەلگەنى ءۇشىن مەملەكەتىمىزدىڭ باسشىسىنا العىس ءبىلدىرىپ، قازاقستانمەن ىنتىماقتاستىقتى دامىتۋدىڭ ستراتەگيالىق ماڭىزىن اتاپ ءوتتى.
«ءبىز ءۇشىن بۇل – ۇلكەن ابىروي. قازاقستان مەن رەسەي اراسىنداعى دوستىق بايلانىستار اياسىندا ءسىزدىڭ ەلىڭىزبەن ىقپالداستىقتى نىعايتۋ مۇمكىندىگىن جوعارى باعالايمىز. قازاقستان – تاتارستان رەسپۋبليكاسى ءۇشىن ستراتەگيالىق سەرىكتەس. قازاقستاننىڭ ايماقتارىمەن كوپتەگەن كەلىسىم جاسالعان. ءسىزدىڭ ەلىڭىزدە تابىستى جۇمىس ىستەپ جاتقان كومپانيالارىمىزدى كوپتەپ مىسالعا كەلتىرۋگە بولادى»، – دەدى رۋستام ميننيحانوۆ.
كەزدەسۋ سوڭىندا رۋستام ميننيحانوۆ قازاقستان مەن تاتارستان اراسىنداعى ىنتىماقتاستىقتى دامىتۋعا، ەكى ەل اراسىنداعى دوستىق پەن ءوزارا تۇسىنىستىكتى نىعايتۋعا قوسقان ەلەۋلى ۇلەسى ءۇشىن قاسىم-جومارت توقايەۆتى «دۋسلىك» وردەنىمەن ماراپاتتادى.
