قازاقستاننىڭ باس پروكۋراتۋراسى: الەۋمەتتىك جەلىدە ۇلتارالىق ارازدىقتى قوزدىرۋ جيىلەگەن

قاداعالاۋشى ورگاننىڭ رەسمي مالىمدەمەسىندە الەۋمەتتىك جەلىدە الەۋمەتتىك جانە ۇلتارالىق الاۋىزدىقتى تۋعىزاتىن اقپاراتتار شىعىپ جاتقانى تۋرالى ايتىلعان.

"اۆتورلار ازاماتتاردىڭ ۇلتتىق ار-نامىسىنا نەمەسە جالپى ەتنيكالىق توپقا ادەيى ءتىل تيگىزەدى. وزگە ۇلت وكىلدەرىنە، سونىڭ ىشىندە تىلگە قاتىستى كوزقاراسىنا قاراي كۇش قولدانۋعا اشىق شاقىرىپ جاتادى. ادەتتە، ونداي ماتەريالداردىڭ اۆتورلارى ۇستالعاننان كەيىن وكىنىپ، حالىق الدىندا كەشىرىپ سۇرايدى. ءبىراق ولار جاۋاپكەرشىلىكتەن بوساتىلمايدى"، – دەيدى پروكۋرورلار.

وسى سەكىلدى دەرەكتەر قىلمىستىق كودەكستىڭ 174-بابى بويىنشا جازالانادى. وعان سايكەس 2-7 جىلعا باس بوستاندىعىنان ايىرۋ، ال اۋىر سالدارى بولسا، 12-20 جىلعا باس بوستاندىعىنان ايىرۋ جازاسى قاراستىرىلعان.

سونىمەن قاتار مۇنداي ارەكەتتەر قىلمىستىق كودەكستىڭ 3-بابى بويىنشا ەكسترەميستىك قىلمىستارعا جاتادى. ال ەكسترەميستىك ارەكەتتەر ءۇشىن قاتاڭ جازا قولدانىلادى. ول ادام وكىنىپ، كەشىرىم سۇراسا دا، تاتۋلاسسا دا، قاماۋعا الىنادى. بۇل ساناتتاعى قىلمىستار مەرزىمى ەسكىرگەن ىستەرگە دە جاتقىزىلمايدى. سوندىقتان كەز كەلگەن ۋاقىتتا تەرگەۋدى باستاۋعا بولادى. وعان راقىمشىلىق جاسالمايدى.

"بۇدان بولەك، مەرزىمىنەن بۇرىن بوساتۋ قولدانىلمايدى، جەڭىل جازامەن اۋىستىرۋ نەمەسە جازانى كەيىنگە قالدىرۋ دا قاراستىرىلماعان. ەكسترەميستىك قىلمىستار ءۇشىن سوتتالعاندار تەرروريزم جانە ەكسترەميزممەن بايلانىسى بار ۇيىمدار مەن تۇلعالاردىڭ تىزىمىنە ەنگىزىلەدى. سودان باستاپ قارجى مەن مۇلكىن پايدالانۋ جاعىنان شەكتەۋ قويىلادى. بەلگىلى ءبىر بانك وپەراسيالارىن دا جاساي المايدى"، – دەپ اتاپ ءوتتى پروكۋرورلار.

ستاتيستيكا بويىنشا 2019 جىلدان بەرى قازاقستاندا 21 ادام ۇلتارالىق الاۋىزدىقتى تۋعىزعانى ءۇشىن سوتتالدى. ماسەلەن، 2021 جىلى الماتى تۇرعىنى 7 جىلعا باس بوستاندىعىنان ايىرىلدى. سول سياقتى WhatsApp جانە Youتube ارقىلى ەتنيكالىق دياسپورا وكىلدەرىنە قاتىستى نامىسقا تيەتىن پىكىر ايتقان الماتىلىق 5 جىلعا سوتتالدى.