مال قۇنىن شارىقتاتپاي، حالىققا وڭتايلى باعانى ۇسىنۋعا شاقىردى.
قازاقستاننىڭ باس يمامى ناۋرىزباي قاجى تاعان ۇلى وتانداستارىنا ۇندەۋ جاريالادى. بۇل ۇندەۋدە باس ءمۇفتي ايت قارساڭىندا مالدىڭ، ازىق-تۇلىكتىڭ باعاسىن كوتەرمەۋگە شاقىردى، قاراپايىم ازاماتتاردى قايىرىمدىلىق شاراعا قاتىسۋعا ۇگىتتەدى، دەپ حابارلايدى Almaty-akshamy.kz Muftyat.kz cايتىنا سىلتەمە جاساپ.
ساناۋلى كۇندەردەن كەيىن كۇللى مۇسىلمان حالقى ەڭ ماڭىزدى مەرەكەلەردىڭ ءبىرى – قۇربان ايت مەيرامىن تويلايدى. مۇسىلماندارعا ارنالعان 2021 جىلدىڭ كۇنتىزبەسىنە سايكەس، بيىل قۇربان ايت 20، 21، 22 شىلدە كۇندەرى تويلانادى.
«ايت كۇندەرى حالىق تاراپىنان مال ساتىپ الۋعا دەگەن سۇرانىستىڭ ارتا تۇسەتىنى بەلگىلى. وسى رەتتە ەلىمىزدەگى بارشا شارۋا قوجالىقتارىنىڭ قوجايىندارىن ۇلىق مەيرام – قۇربان ايتتىڭ قۇرمەتىنە مال قۇنىن شارىقتاتپاي، حالىققا وڭتايلى باعانى ۇسىنۋعا شاقىرامىن. سونىمەن قاتار، بارشا كاسىپكەرلەردى تۇرعىندار كۇندە تۇتىناتىن الەۋمەتتىك ماڭىزى بار ازىق-تۇلىك باعاسىنا مۇمكىندىگىنشە جەڭىلدىك جاساۋعا ۇندەيمىن»،– دەلىنگەن ءمۇفتيدىڭ ۇندەۋىندە.
قازاقستاننىڭ باس ءمۇفتيى ناۋرىزباي قاجى تاعان ۇلى كاسىپكەرلەر مەن بيزنەسمەندەردەن وزگە قاتارداعى وتانداستارىن قايىرىمدىلىق شاراعا قاتىسۋعا شاقىردى.
«ارداقتى اعايىن، سۇيىكتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «...كىمدە-كىم مۇسىلمان باۋىرىنىڭ قاجەتىنە جاراسا، اللا تاعالا دا ونىڭ قاجەتىن وتەيدى...» دەگەن ءسۇيىنشى حابار جەتكىزگەن. قازاقستان مۇسىلماندارى ءدىني باسقارماسى قۋاڭشىلىقتان زارداپ شەككەن وڭىرلەردەگى شارۋالارعا قولداۋ كورسەتۋ ماقساتىندا «قيىندىقتا ەل بىرگە» اتتى قايىرىمدىلىق اكسياسىن باستادى. اكسيا اياسىندا قىزىلوردا، ماڭعىستاۋ وبلىستارىنا جەم-شوپ جونەلتىلەتىن بولادى. وسى يگى ىسكە ۇلەس قوسىپ، سىناقتى ساتتەردى باستان كەشىپ وتىرعان وتانداستارىمىزعا قول ءۇشىن سوزۋعا شاقىرامىن»،– دەلىنگەن باس ءمۇفتيدىڭ ۇندەۋىندە.