7 مىڭ جۇمىس ورنى اشىلادى دەپ كۇتىلۋدە.
قالانىڭ يندۋستريالدى ايماعىنىڭ ديرەكتورى ءادىل امرالين وڭىرلىك كوممۋنيكاسيالار قىزمەتىندە وتكەن بريفينگتە قولدانىستاعى جوبالار تۋرالى ايتتى، دەپ حابارلايدى Almaty-akshamy.kz.
اتاپ ايتقاندا، «سك راحات» اۆتوكلاۆتى گازوبەتون وندىرەتىن جاڭا زاۋىتتىڭ قىزمەتىنە توقتالدى.
ءادىل ءامراليننىڭ ايتۋىنشا، وڭىرلىك ۇيلەستىرۋ كەڭەسىنىڭ (وۇك) سوڭعى وتىرىسىندا «راحات سك» اۆتوكلاۆتى گازوبەتون ءوندىرۋ زاۋىتى جوباسىنىڭ پارامەترلەرىنە وزگەرىستەر ەنگىزىلگەن.
«ينۆەستوردىڭ سۇراۋى بويىنشا كاسىپورىن شىعارىلاتىن ءونىمنىڭ اسسورتيمەنتىن كەڭەيتىپ، گاز بلوكتارمەن قاتار Color Mix برۋسچاتكاسىن، تروتۋار پليتالارىن، قاپتاۋىش كىرپىشتەردى، دەكوراتيۆتى بلوكتاردى، قابىرعا پانەلدەرى مەن بلوكتاردى وندىرەتىن بولادى. تولىقتىرۋلاردى ەنگىزۋ وندىرىسكە ينۆەستيسيالاردى 1،8 ملرد تەڭگەگە ارتتىرادى»، – دەدى الماتى يندۋستريالدى ايماعىنىڭ ديرەكتورى.
بۇگىندە جاڭا جوبالاردى ەسكەرە وتىرىپ، 62 كومپانيا يندۋستريالدى ايماقتىڭ قاتىسۋشىلارى. ياعني 241 ملرد تەڭگەگە 7 مىڭ جۇمىس ورنى اشىلادى دەپ كۇتىلۋدە.
سپيكەردىڭ ايتۋىنشا، 2020 جىلى الماتى يندۋستريالدى ايماعىنىڭ رەزيدەنت كاسىپورىندارى 4،2 ملرد تەڭگە سالىق تولەگەن.
وسى جىلى 245 جۇمىس ورنىن قۇرۋمەن 13،8 ملرد. تەڭگەگە ءۇش جوبا ىسكە قوسىلدى (كمك Investment – ەكىنشى كەزەڭ، «راحات» سك، «گ. س. گ. ۆىسوتنيك»)، سونداي-اق 1،5 مىڭ ش. م. وندىرىستىك الاڭداردى قۇرۋمەن شاعىن ونەركاسىپتىك پارك (ADS Industries) ىسكە قوسىلدى.
بارلىعى 16 جوبا ىسكە اسىرىلدى (BRB APK، Almapack، DOC Co.LTD، TOKYO ROPE ALMATY، KMK Investment - ءبىرىنشى جانە ەكىنشى كەزەڭدەر، KazTigerTape، «ەنكو»، ASSET، «تەحنوۆيد»، «مپز بيجان»، «دورحان-الماتى، «المەرەك»، Hyundai Trans Kazakhstan، «راحات سك»، «گ.س. گ. ۆىسوتنيك») جالپى سوماسى 77،4 ملرد تەڭگەنى قۇرادى. 154،9 ملرد تەڭگە كولەمىندە ءونىم ءوندىرىلدى. 81،5 گا اۋماق قامتىلدى، 2 593 جۇمىس ورنى قۇرىلدى.
ءادىل امرالين 2021 جىلدىڭ سوڭىنا دەيىن تاعى جەتى جوبانىڭ سالىناتىنىن ايتتى. ولار «قاز-ديا-تەست»، City Stone، «الەم تىنىسى»، Asia steel Pipe corporation، «ەلەكتروبار»، Valtherm، Technokont، جالپى سوماسى 37،8 ملرد تەڭگەنى قۇرايدى. 658 جۇمىس ورنىن قامتيدى. سونداي-اق بيىل يندۋستريالدى ايماقتا ءتورت ونەركاسىپتىك پاركتى ىسكە قوسۋ جوسپارلانۋدا.
2025 جىلعا دەيىن يندۋستريالىق ايماقتا جالپى ينۆەستيسيا سوماسى 111،95 ملرد تەڭگەگە 34 ينۆەستيسيالىق جوبانى ىسكە اسىرۋ جوسپارلانىپ وتىر. سونداي-اق قوسىمشا 3 294 جۇمىس ورنىن اشۋعا مۇمكىندىك بەرەدى.
ەسكە سالساق، الماتى يندۋستريالدى اۋماعىنىڭ جالپى اۋدانى 490 گا قۇرايدى، ونىڭ 326 گا اۋماعى پايدالى ايماققا جاتادى، ينفراقۇرىلىمعا تاعى 164 گا جەر بولىنگەن. بۇگىنگى كۇنى ينۆەستيسيالىق جوبالاردى ىسكە اسىرۋ ءۇشىن 251،5 گا جەر بەرىلگەن، 74،5 گا اۋماق ازىرگە بوس تۇر.