ازىق-تۇلىك پەن مال باعاسىن وسىرمەۋدى، حالىقتىڭ قالتاسىمەن ساناسۋعا شاقىردى.
بيىل مۇسىلماندار ءۇشىن قاسيەتتى قۇربان ايت 9 شىلدەگە بەلگىلەنگەن. وسىعان وراي ەلىمىزدىڭ باس ءمۇفتيى ناۋرىزباي قاجى تاعان ۇلى كاسىپكەرلەرگە ۇندەۋ جاسادى، دەپ حابارلايدى Almaty-akshamy.kz Egemen.kz سىلتەمە جاساپ.
ناۋرىزباي قاجى تاعان ۇلى كاسىپكەرلەردى ازىق-تۇلىك پەن مال باعاسىن وسىرمەۋدى، حالىقتىڭ قالتاسىمەن ساناسۋعا شاقىردى. سونداي-اق بيىل دا قۇرباندىق شالۋ ەل اۋماعىندا وفلاين جانە ونلاين رەجيمدە جۇزەگە اساتىنىن ايتتى. بۇل باعىتتا ارنايى سايت جۇمىس ىستەمەك.
«جىل ساناۋى بويىنشا، 8 شىلدە كۇنى، اللا قالاسا، ارافا كۇنى بولادى. ال ەندى قۇربان ايت مەرەكەسىنىڭ العاشقى كۇنى توعىزىنشى شىلدەگە كەلىپ وتىر. اللا تاعالا بارشامىزدىڭ تىلەگىمىزدى-نيەتىمىزدى قابىل ەتسىن!» - دەدى ناۋرىزباي قاجى تاعان ۇلى.
ايتا كەتسەك، ونلاين تۇردە قۇربان شالام دەۋشىلەر qurban2022.kz سايتى ارقىلى قۇرباندىق مالىن تاڭداپ، كورسەتىلگەن رەكۆيزيتكە قاجەتتى قاراجاتتى اۋدارا الادى. قوي مەن ەشكىنى جەكە ادام، ال ءىرى قارا مەن تۇيە مالىن ءبىر نەمەسە 7 ادام بىرىگىپ شالسا بولادى.
سونداي-اق تولەم جاساۋ بارىسىندا حابارلاماعا تاپسىرىس ءنومىرى مەن قۇرباندىق شالۋشىنىڭ ءاتى-جونىن جازۋ مىندەتتى. قۇرباندىق شالىنعان سوڭ ونىڭ فوتو- جانە بەينەەسەبى تاپسىرىس بەرۋشى كورسەتكەن WhatsApp نومىرگە جىبەرىلەدى.