2025 جىلى قازاقستاندا اۆتوموبيل جولدارىن سالۋ جانە كۇتىپ-ۇستاۋ ساپاسىن ارتتىرۋعا، نارىق قاتىسۋشىلارىنىڭ جاۋاپكەرشىلىگىن كۇشەيتۋگە، سونداي-اق جول ينفراقۇرىلىمىن پايدالانۋشىلاردىڭ قۇقىقتارىن قورعاۋعا باعىتتالعان اۆتوجول سالاسىندا ءبىرقاتار ماڭىزدى رەفورمالار ىسكە اسىرىلدى. بارلىق جاڭاشىلدىقتار زاڭنامالىق جانە نورماتيۆتىك-قۇقىقتىق دەڭگەيدە بەكىتىلدى، - دەپ حابارلايدى Aqshamnews.kz.
نەگىزگى قادامداردىڭ ءبىرى – جول-قۇرىلىس ماتەريالدارىنىڭ ءبىرىڭعاي بازاسىن زاڭنامالىق تۇرعىدا بەكىتۋ بولدى (https://rcmbase.qazjolgzi.kz/). بۇل پلاتفورما اۆتوموبيل جولدارىن سالۋ جانە جوندەۋ كەزىندە قولدانىلاتىن ماتەريالدار مەن تەحنولوگيالار تۋرالى دەرەكتەر جيناقتالعان ورتالىقتاندىرىلعان اقپاراتتىق جۇيە بولىپ تابىلادى. بارلىق مالىمەتتەر سىناقتان وتكەن جانە ساپاسى مەن قولدانۋ سالاسىن راستايتىن قۇجاتتارمەن سۇيەمەلدەنەدى. سونىمەن قاتار، بازادا كارەرلەر، اسفالتبەتون زاۋىتتارى جانە وزگە دە وندىرىستىك نىساندار تۋرالى اقپارات قامتىلعان.
اعىمداعى جىلى جول قۇرىلىسى ساپاسىنا تەحنيكالىق جانە اۆتورلىق قاداعالاۋ سالاسىنداعى جاۋاپكەرشىلىك كۇشەيتىلدى. ەندى قاداعالاۋدى جۇزەگە اسىراتىن ۇيىمداردىڭ شتاتىندا جول قۇرىلىسى سالاسىندا بىلىكتى مامانداردىڭ بولۋى مىندەتتەلدى، بۇل بۇرىن اككرەديتتەۋ كەزىندە مىندەتتى تالاپ بولىپ سانالماعان. بۇدان بولەك، «سىبايلاس جەمقورلىققا قارسى ءىس-قيمىل تۋرالى» زاڭعا ەنگىزىلگەن تۇزەتۋلەر اياسىندا تەحنيكالىق جانە اۆتورلىق قاداعالاۋدى جۇزەگە اسىراتىن تۇلعالار مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن ادامدارعا تەڭەستىرىلدى. بۇل ولاردىڭ زاڭ الدىنداعى جاۋاپكەرشىلىگىن ەداۋىر ارتتىرادى.
اقىلى اۆتوموبيل جولدارىن پايدالانۋشىلاردىڭ قۇقىقتارىن قورعاۋ دا ماڭىزدى جاڭالىقتاردىڭ ءبىرى بولدى. ەندى دەفەكتىلەر نەمەسە جولدىڭ نورماتيۆتىك جاي-كۇيىنە سايكەس كەلمەۋ فاكتىلەرى انىقتالعان اقىلى جول ۋچاسكەلەرى بويىنشا جۇرگىزۋشىلەر جول ءجۇرۋ اقىسىن تولەۋدەن بوساتىلادى. مۇنداي ۋچاسكەلەردە تولەم كەمشىلىكتەر تولىق جويىلعانعا دەيىن الىنبايدى.
تاعى ءبىر ماڭىزدى قادام – اۆتوموبيل جولدارى ءۇشىن ناقتى جوندەۋ مەرزىمدەرىن بەكىتۋ. نورماتيۆتىك دەڭگەيدە جول ساناتى، قوزعالىس قارقىندىلىعى جانە كليماتتىق جاعدايلار ەسكەرىلە وتىرىپ، اعىمداعى، ورتا جانە كۇردەلى جوندەۋ جۇمىستارىنىڭ جاڭا كەزەڭدىلىگى ايقىندالدى.
سونداي-اق جول سالاسى قىزمەتكەرلەرىنىڭ بىلىكتىلىگىن ارتتىرۋ قاعيدالارى بەكىتىلدى. جاڭا تالاپتارعا سايكەس، ماماندار كەمىندە ءۇش جىلدا ءبىر رەت، كەمىندە 40 اكادەميالىق ساعاتتى قۇرايتىن وقۋدان وتۋگە مىندەتتى. ال جول ۇيىمدارىنىڭ باسشىلارى لاۋازىمعا تاعايىندالعاننان كەيىن التى اي ىشىندە كۇندىزگى وقۋ فورماتىندا ءبىلىمىن جەتىلدىرۋى ءتيىس. وقۋ قورىتىندىسى بويىنشا قورىتىندى باعالاۋ جۇرگىزىلىپ، ءۇش جىل مەرزىمگە سەرتيفيكات بەرىلەدى.
جالپى العاندا، قابىلدانعان شارالار ستاندارتتاۋعا، سيفرلىق ەسەپكە الۋعا، ساپانى باقىلاۋدى كۇشەيتۋگە جانە اۆتوموبيل جولدارىن پايدالانۋشىلاردىڭ مۇددەلەرىنە نەگىزدەلگەن اۆتوجول سالاسىن باسقارۋدىڭ جاڭا مودەلىن قالىپتاستىرادى.