بيىل قازاقستاندىقتار جەتى سايىسقا قاتىسادى. ولاردىڭ ۇشەۋى ەل اۋماعىندا، تورتەۋى شەتەلدە وتەدى
«تەڭىز كۋبوگى» ازەربايجان جەرىندە ۇيىمداستىرىلىپ وتىر، «بەيبىتشىلىك جاۋىنگەرى» ارمەنيادا، «تانك بياتلونى» جانە «ەلبرۋس شەڭبەرى» جارىستارى رەسەيدە وتەدى، دەپ حابارلايدى Almaty- akshamy.kz قورعانىس مينيسترلىگىنە سىلتەمە جاساپ.
قازاقستانعا «ارتيللەريادان وق اتۋ شەبەرلەرى»، «مەريديان» جانە «تاكتيكالىق مەرگەن» جارىستارىنا قاتىسۋ ءۇشىن ءار ەلدەن اسكەري قىزمەتشىلەر كەلىپ جاتىر. سوڭعى اتالعان ەكى بايقاۋ دا ەلىمىزدىڭ اۋماعىندا ءبىرىنشى رەت وتكىزىلىپ وتىرعانىن ايتا كەتكەن ءجون.
ال «ارتيللەريادان وق اتۋ شەبەرلەرى» سايىسى جامبىل وبلىسى گۆاردەيسك اسكەري قالاشىعىندا وسىمەن التىنشى مارتە وتپەكشى. بۇل سايىستا قازاقستاندىق ارتيللەريستەر ءاردايىم ءبىرىنشى ورىن الىپ ءجۇر. بيىلعى جىلى دا ءبىرىنشى ورىن الامىز دەگەن نيەت باسىم. حالىقارالىق ءدۇبىرلى دوداعا ازەربايجان، ارمەنيا، بەلارۋس، ۆەنەسۋەلا، زيمبابۆە، قازاقستان، قىرعىزستان، رەسەي جانە تاجىكستان كوماندالارى سايىسقا تۇسپەك.
«قازاقستان قارۋلى كۇشتەرىنىڭ باسشىلىعىنا سايىستى وسىنداي قولايلى جاعداي جاساپ، ۇيىمداستىرعانى ءۇشىن العىسىمدى بىلدىرگىم كەلەدى. ءبىز بۇل جەرگە العاش رەت كەلىپ تۇرعان جوقپىز. جارىسقا مۇقيات دايىندالدىق. اسكەري قىزمەتشىلەردىڭ كوڭىل-كۇيى جاقسى، ءساتتى جارىس بولار دەگەن ۇمىتتەنەمىن»، – دەپ اتاپ ءوتتى قىرعىز رەسپۋبليكاسى قارۋلى كۇشتەرى كومانداسىنىڭ باسشىسى پولكوۆنيك جوودار ايتالييەۆ.
اقمولا وبلىسىنىڭ ششۋچينسك قالاسىندا توپوگرافتار اراسىندا وتەتىن «مەريديان» اسكەري-سپورتتىق جارىسىنا ارمەنيا، بەلارۋس، ۆەتنام، قازاقستان، جۇڭگو، رەسەي جانە وزبەكستاننىڭ اسكەري قىزمەتشىلەرى قاتىسادى.
«ءبىز «مەريديان» بايقاۋىنا قاتىسۋ ءۇشىن ارمەنيادان كەلدىك. مۇندا قۇشاق جايا قارسى الدى. «بۋراباي» ۇلتتىق تابيعي پاركىندە، ايگىلى ابىلايحان الاڭىندا بولىپ، ششۋچينسك-بۋراباي كۋرورتتىق ايماعىنىڭ باسقا دا كورىكتى جەرلەرىن كوردىك. كەرەمەت اسەر الدىق. جۇمىس ىستەيتىن جاڭا جاعدايعا بەيىمدەلىپ، زەردەلەيتىن ۋاقىتتىڭ بولعانى قانداي جاقسى»، – دەپ ارمەنيا كومانداسىنىڭ وكىلى پودپولكوۆنيك كارەن ماچكاليان العان اسەرىن ايتتى.
قاراعاندى وبلىسىنىڭ «سپاسسك» وقۋ-جاتتىعۋ ورتالىعىنا «تاكتيكالىق مەرگەن» كونكۋرسىنا قاتىسۋ ءۇشىن ارمەنيا، بەلارۋس، ۆەتنام، قازاقستان، جۇڭگو، مالي، نيكاراگۋا، رەسەي، تاجىكستان جانە وزبەكستان اسكەرلەرىنىڭ مەرگەندەرى كەلدى.
«اسكەري قىزمەتشىلەر جاۋىنگەرلىك شەبەرلىكتەرىن جەكە، جۇپ بولىپ، توپ قۇرامىندا جانە ەستافەتالىق سايىستا كورسەتىپ، باعىن سىنايتىن بولادى. جارىستاردى وتكىزۋ ءۇشىن ءارتۇرلى جاعدايدى يميتاسيالايتىن نىسانا الاڭدارى مەن اتىس تيرلەرى ارنايى جاسالعان. قاتىسۋشىلار ءۇشىن قارۋ-جاراق پەن وق-دارىلەردى ءقاۋىپسىز قولدانۋ شارالارى جونىندە نۇسقاۋلىق تا وتكىزدىك»، – دەپ ءتۇسىندىردى كونكۋرستىڭ باس تورەشىسى پولكوۆنيك ديدار اۋشاتوۆ.
قازىرگى ۋاقىتتا شەتەلدە وتەتىن كونكۋرستارعا قاتىساتىن قازاقستاندىق اسكەري قىزمەتشىلەر جارىس وتەتىن جەرلەرگە كەلدى. ولار ازەربايجاندا («تەڭىز كۋبوگى») جانە كاباردينو-بالقار رەسپۋبليكاسىنىڭ تەرسكول جەرىندە («ەلبرۋس شەڭبەرى») جاتتىعۋلار مەن جابدىقتاردى دايىنداۋعا كىرىستى.
بۇدان وزگە، «الابينو» پوليگونىندا تانكيستەر جارىسىنا جەرەبە تاستاۋ ءراسىمى ءوتتى. قازاقستاندىقتار ءبىرىنشى ديۆيزيوننىڭ ەكىنشى جارىسىندا جاسىل ءتۇستى تانكتە سايىساتىن بولادى. «تانك بياتلونىنا» بارلىعى 21 كوماندا قاتىساتىنى ەستەرىڭىزگە سالا كەتەيىك.
ءبىزدىڭ اسكەري قىزمەتشىلەر ارمەنيادا وتەتىن «بەيبىتشىلىك جاۋىنگەرى» سايىسىنا 10 تامىز كۇنى ۇشادى.
حالىقارالىق ارميا ويىندارىنا 37 ەلدەن 275 كوماندا قاتىسادى دەپ جوسپارلانىپ وتىر. بۇل اسكەري ويىندارعا العاش رەت نيگەر مەن رۋاندا كوماندالارى قاتىسادى.