قازاقستاننىڭ اسكەري قىزمەتشىلەرى «دەسانتتىق ۆزۆود» بايقاۋىندا باعىن سىنايدى

وسى ماقساتتا اسكەريلەر دايىندىق جۇمىستارىن جۇرگىزىپ جاتىر.

قازاقستاندىق اسكەريلەر رەسەيدە وتەتىن جارىسقا دايىندالىپ جاتىر. بۇل شارا تامىزدىڭ 9 كۇنى ريازان قالاسىندا وتەدى، دەپ حابارلايدى Almaty-akshamy.kz.

«الماتىداعى دەسانتتىق-شابۋىلداۋ بريگاداسىنىڭ جانە قۇرلىق اسكەرلەرى اسكەري ينستيتۋتىنىڭ پوليگوندارىندا اسكەري قىزمەتشىلەر ارميالىق حالىقارالىق ويىندار شەڭبەرىندە «دەسانتتىق ۆزۆود» كونكۋرسىنا قاتىسۋ ءۇشىن دايارلىقتان وتۋدە»، – دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.

مامانداردىڭ ايتۋىنشا، دەسانتشىلار جاتتىعۋ قارقىنىن ۇدەتۋدە. بۇل رەتتە اسكەري قىزمەتشىلەر وق اتۋ دايارلىعىن جەتىلدىرىپ، دەنە شىنىقتىرۋ دايىندىعىن ارتتىرۋدا.

«دايارلىق جوسپارعا سايكەس ەكى كەزەڭدە وتكىزىلۋدە. ءبىرىنشى كەزەڭ بارىسىندا ءبىز وق اتۋدى جۇكتەمەسىز ورىندادىق. ال ەكىنشى كەزەڭدە مينۋتىنا پۋلس قارقىنى 170 سوققىعا دەيىن، سونداي-اق ءارتۇرلى قالىپتا ءدال كوزدەپ وق اتۋ پىسىقتالدى»، – دەدى تانكىگە قارسى قول گراناتااتقىشىنان وق اتۋ جونىندەگى نۇسقاۋشى مايور سەرگەي باتۋرين. 

ونىڭ ايتۋىنشا، بۇرىن وتكىزىلگەن جارىستاردا جول بەرىلگەن قاتەلىكتەر زەردەلەنىپ، سەبەپتەرىنە تالداۋ جاسالدى. ولاردى جويۋ بويىنشا شارالار قابىلداندى.  

نۇسقاۋشىلار جاتتىقتىرۋ بارىسىندا تانكىگە قارسى قول گاراناتااتقىشىنان وق اتۋ كەزىندە ەفرەيتور داۋرەن احمەتقاليدىڭ جاقسى ناتيجە كورسەتكەنىن اتاپ ءوتتى. اسكەري قىزمەتشى 150، 200، 250 مەتر قاشىقتىقتاعى جەرتاسادان تانكىنى يميتاسيالايتىن نىساناعا ءدال تيگىزىپ جويادى. 

كونكۋرس ءتورت كەزەڭنەن تۇرادى. ولار دەسانت ءتۇسىرۋدى، جەرگە قونۋ الاڭىندا جينالۋدى، 10 كيلومەتر قاشىقتىققا مارش جاساۋدى، جەكە جارىستى، وق اتۋ كەزىندە جاۋىنگەرلىك ماشينامەن ىزگە ءتۇسۋ جارىسىن، سونداي-اق جاۋىنگەرلىك ماشينالارداعى ەستافەتانى قامتيدى.

بيىلعى جىلى ارميالىق حالىقارالىق ويىندار 12 ەلدە وتەدى. ويىندار باعدارلاماسى 34 كونكۋرستان تۇرادى. ولاردىڭ ىشىندە ەكەۋى – «ارتيللەريادان وق اتۋ شەبەرى» مينااتقىشتار ەسەپتوپتارىنىڭ سايىسى جانە «سۇڭقار اڭشىلىعى» ۇشقىشسىز ۇشاتىن اپپاراتتار ەسەپتوپتارىنىڭ سايىسى قازاقستاندا وتەدى.