ەلىمىزدىڭ قارۋلى كۇشتەرىنىڭ اسكەري قىزمەتشىلەرى ءبىرقاتار سايىستاردان جۇلدەلى ورىندار يەلەنۋدە.
ارميا حالىقارالىق ويىندارى اياقتالۋعا جاقىن. قازاقستاننىڭ اسكەري قىزمەتشىلەرى 11 كونكۋرسقا قاتىستى. ونىڭ 2ء-ۋى ەل اۋماعىندا ءوتتى، دەپ حابارلادى Almaty-akshamy.kz قورعانىس مينيسترلىگىنىڭ رەسمي سايتىنا سىلتەمە جاساپ.
ۇشقىشسىز ۇشۋ اپپاراتتارىنىڭ ەسەپتوپتارى اراسىنداعى «سۇڭقار اڭشىلىعى» كونكۋرسىندا قازاقستان كومانداسى بۇلتارىسسىز جەڭىسكە جەتتى. ەكىنشى ورىندى – بەلارۋس، ءۇشىنشى ورىندى – رەسەي ەنشىلەدى.
«ارتيللەريادان وق اتۋ شەبەرلەرى» – بۇل مينااتقىش بولىمشەلەردىڭ جارىسى. قازاقستان جاۋىنگەرلەرى تاباندى كۇرەستە نەگىزگى قارسىلاسى – رەسەيلىك اسكەري قىزمەتشىلەردەن باسىپ وزىپ ءبىرىنشى ورىن الدى. ءۇشىنشى ورىن ازەربايجانعا بۇيىردى.
بۇدان وزگە، ەل قارۋلى كۇشتەرىنىڭ اسكەري قىزمەتشىلەرى ءبىرقاتار سايىستاردان جۇلدەلى ورىندار الدى. «دەسانت ۆزۆودى» كونكۋرسىندا رەسەيلىك دەسانتشىلارعا عانا ەسە جىبەرىپ، ەكىنشى ورىنعا تابان تىرەدى.
قازاقستان سونداي-اق، «تاكتيكالىق مەرگەن»، «اتتار مارافونى»، «بەيبىتشىلىك جاۋىنگەرى»، «ءتارتىپ ساقشىسى»، «ەلبرۋس شەڭبەرى»، «تەڭىز كۋبوگى» جانە «ارميا مادەنيەتى» كونكۋرستارىندا «قولا» جۇلدە يەگەرى اتاندى.
ارميا حالىقارالىق ويىندارىنا قاتىسۋشى اسكەري قىزمەتشىلەر وتاننان جىراقتا جۇرسە دە، جامبىل وبلىسىندا ورىن العان ءورت كەزىندە بۇكىل ەلمەن بىرگە قايعىرعانىن بىرنەشە رەت اتاپ ءوتتى. ارميا ويىندارىنداعى وزدەرىنىڭ جوعارى جەتىستىكتەرىن قازا تاپقانداردىڭ رۋحىنا ارنايدى.
بۇگىن ارميا حالىقارالىق ويىندارىنىڭ جابىلۋ ءراسىمى كۇنى «تانك بياتلونى» كونكۋرسىنىڭ اقتىق سايىسى وتەدى. وندا ازەربايجاننىڭ، قازاقستاننىڭ، جۇڭگو جانە رەسەيدىڭ تانك ەكيپاجدارى باعىن سىنايدى.