قازاقستاننىڭ قارۋلى كۇشتەرى كابۋلداعى تولىق حاوس جاعدايىندا قىسقا ۋاقىتتا كۇردەلى وپەراسيا جۇرگىزە الدى.
ساياساتتانۋشى، ق ر پرەزيدەنتىنىڭ كەڭەسشىسى ەرلان قارين اۋعانستاننان ق ر ازاماتتارىن ەۆاكۋاسيالاۋ وپەراسياسىنىڭ قالاي جۇرگىزىلگەنىن باياندادى، دەپ حابارلايدى Almaty-akshamy.kz.
«قازاقستاننىڭ قارۋلى كۇشتەرى كابۋلداعى تولىق حاوس جاعدايىندا قىسقا ۋاقىتتا كۇردەلى وپەراسيا جۇرگىزە الدى. الدىمەن وزدەرىندە الاڭداۋشىلىق پەن پروبلەما تولىپ جاتقان امەريكالىقتارمەن كەلىسسوز جۇرگىزۋ كەرەك بولدى، سودان كەيىن ازاماتتارىمىزدى كابۋلعا جيناپ، اۋەجايعا ءقاۋىپسىز تۇردە اپارىپ، سودان كەيىن بلوكبەكەتتەر ارقىلى اۋەجاي اۋماعىنا كىرۋ ءۇشىن سونداعىلاردىڭ بارىمەن كەلىسسوزدەر جۇرگىزىلدى»، - دەپ جازدى ە. قارين ءوزىنىڭ Telegram-پاراقشاسىندا.
ساياساتتانۋشىنىڭ ايتۋىنشا، 15 تامىز كۇنى جەكسەنبىدە پرەزيدەنت ق ر ازاماتتارى بەن ديپلوماتتارىنىڭ قاۋىپسىزدىگىن قامتاماسىز ەتۋ بويىنشا تاپسىرما بەردى، ال 18 تامىزدا ولار قازاقستانعا جەتكىزىلدى.
«وپەراسيا 3 كۇن ىشىندە جوسپارلاندى، ۇيىمداستىرىلدى جانە وتكىزىلدى. ءبىزدىڭ اسكەريلەر مەن ديپلوماتتارىمىز پاندەميا كەزىندە، 2020 جىلدىڭ كوكتەمىندە ازاماتتارىمىزدى ءتۇرلى ەلدەردەن شۇعىل اكەتۋگە ءماجبۇر بولعاندا جانە «جۋسان» وپەراسياسى كەزىندە وسىنداي گۋمانيتارلىق وپەراسيالاردى جۇرگىزىپ، جاقسى تاجىريبە جيناقتادى. سونداي-اق ءبىزدىڭ اسكەريلەر ءوز ازاماتتارىمىزبەن بىرگە قىرعىز ديپلوماتتارىن دا ەۆاكۋاسيالادى»، - دەدى ەرلان قارين.
ايتا كەتەيىك، 18 تامىز كۇنى قازاقستان اۋعانستاننان 42 ادامدى ەۆاكۋاسيالادى جانە الماتى قالاسىنا جەتكىزدى. ۇشاقتا 25 قازاقستان ازاماتى، ونىڭ ىشىندە 15 ەرەسەك ادام جانە 10 بالا، سونداي-اق ق ر ەلشىلىگىنىڭ قىزمەتكەرلەرى بولعان. ودان باسقا، وسى بورتپەن قىرعىزستان تاراپىنىڭ وتىنىشىمەن 14 ازامات ەۆاكۋاسيالاندى جانە ق ر ەلشىلىگىنە كومەك سۇراپ جۇگىنگەن 1 رەسەي ازاماتى مەن 1 ليتۆا ازاماتى اير-دان شىعارىلدى.