وبالى كىمگە؟ كيىكتىڭ كيەسى ۇرىپ جۇرمەسىن.
كيىك سانىن رەتتەۋگە كىرىسكەن ينسپەكتورلاردىڭ ارەكەتى حالىقتىڭ نارازىلىعىن تۋدىرىپ جاتىر. ۇكىمەتتىڭ قاۋلىسىمەن كيىكتەردىڭ سانىن رەتتەۋگە رۇقسات بەرىلدى، دەپ حابارلايدى Almaty-akshamy.kz.
Azattyq-ruhy.kzء-تىڭ مالىمەتىنشە، اقبوكەندەردىڭ ەڭ كوپ شوعىرلانعان جەرى - بقو اۋماعى. ەلىمىزدە كيىك سانى رەسمي دەرەك بويىنشا 2،6 ميلليوننان اسادى. بيىل جەلتوقسان ايىنا دەيىن 300 مىڭ كيىكتى اۋلاۋعا رۇقسات بەرىلگەن.
بۇگىندە الەۋمەتتىك جەلىدە "بازاردا كيىك ەتى ساتىلىپ جاتىر، 1500 تەڭگە/كگ" دەگەن حابارلامالار تاراپ كەتكەن. جۋرناليست فارحات ابيلوۆتىڭ فەيسبۋكتەگى جازباسىنا قاراعاندا، كيىكتەردى ورال دالاسىنان اتىپ، ءبىر كۇن سالقىنداتىپ، بازارعا الىپ كەلەدى. ءتىپتى whats app-تان ارنايى توپ اشىپ، ادامدار كەزەككە تۇرادى. تالاسىپ الىپ جاتقان كورىنەدى.
الەۋمەتتىك جەلى قولدانۋشىلارى كيىكتەردى وسىنداي جولمەن جويۋ ەشقانداي سانيتارلىق نورماعا ساي كەلمەيتىنىن ايتۋدا. وقىرماندار "باۋىزداماي اتىپ ولتىرگەن كيىكتىڭ ەتىن ادامدار قالاي جەيدى؟"، "بۇلارعا ەشكىم ەكپە دە سالماعان، ەرتەڭ اۋرۋ تاراپ جۇرمەسىن"، "قىزىلوردادا 1450 دەگەن باعامەن ساتىپ جاتىر، ورالعا جاقىن، اتىراۋدا 1700 تەڭگەگە كوتەرىپ ۇلگەردى" دەگەن سىڭايداعى ءتۇرلى پىكىرلەر قالدىرعان.
تاعى ءبىر اقپارات، كيىكتەر رەسەيگە اۋىپ جاتىر دەگەن ۆيدەولار تاراپ جاتىر. وسىعان بايلانىستى تاعى ءبىر پىكىردى نازارلارىڭىزعا ۇسىنامىز:
"كيىكتىڭ سانىن رەتتەۋ كەرەك.ءبىراق كەشەندى تۇردە. ال اۋىلشارۋاشىلىققا 12 ملرد تەڭگە شىعىن كەلدى دەگەنى جالعان. ءبىر شارۋا قوجالىق اقبوكەننەن كەلگەن شىعىندى ناقتى ايتا المايدى. ناقاقتان ناقاق دالا سەركەسىنە جالا جاپتى. بارلىق ماسەلە جەردى وندى-سولدى تاراتىپ تاستاۋدا. اناۋ تابيعات بيشارالارىنىڭ باراتىن جەرى، باساتىن تاۋى، ىشەتىن سۋى قالمادى"، - دەيدى ساكەن دىلداحمەت.