قازاقستانعا تاجىكستان سۋ بەرەتىن بولدى

قازاقستان رەسپۋبليكاسىنىڭ ءوتىنىشى بويىنشا تاجىك تاراپى «باحري توچيك» سۋ قويماسىنان قوسىمشا جىبەرەتىن بولادى.

دۋشانبە قالاسىندا حالىقارالىق ارالدى قۇتقارۋ قورى (حاقق) باسقارماسىنىڭ وتىرىسى اياسىندا قازاقستان مەن وزبەكستاننىڭ ەكىجاقتى كەزدەسۋى ءوتتى، دەپ حابارلايدى Almaty-akshamy.kz ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ مالىمەتىنە سۇيەنە وتىرىپ.

كەزدەسۋگە قازاقستان تاراپىنان ق ر پرەمەر-مينيسترىنىڭ ورىنباسارى رومان سكليار مەن ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعالييەۆ، ال  وزبەكستاننان پرەمەر-مينيستردىڭ ورىنباسارى ش. عانييەۆ، وزبەكستان رەسپۋبليكاسى سۋ شارۋاشىلىعى ءمينيسترى ش. حامرايەۆ قاتىستى.

كەزدەسۋ بارىسىندا تاراپتار سۋ شارۋاشىلىعى سالاسىنداعى ىنتىماقتاستىق ماسەلەلەرىن تالقىلادى، سونداي-اق قولايلى ۆەگەتاسيالىق كەزەڭدى وتكىزۋ بويىنشا پىكىر الماستى.

شاردارا سۋ قويماسىنداعى سۋ شارۋاشىلىعى جاعدايىن جاقسارتۋ ماقساتىندا تاراپتار وزبەكستان رەسپۋبليكاسىنىڭ اۋماعى ارقىلى كەدەرگىسىز سۋ ءترانزيتىنىڭ ماسەلەسىن تالقىلادى. 

اتالعان سۋ كولەمىن قازاقستان رەسپۋبليكاسىنىڭ ءوتىنىشى بويىنشا تاجىك تاراپى «باحري توچيك» سۋ قويماسىنان قوسىمشا جىبەرەتىن بولادى.

بۇدان وزگە، مينيستر ماعزۇم مىرزاعالييەۆ ترانسشەكارالىق سۋ وبەكتىلەرىن بىرلەسىپ باسقارۋ جانە پايدالانۋ تۋرالى كەلىسىم جوباسىن كەلىسۋدى اياقتاۋدىڭ ماڭىزدىلىعىن اتاپ ءوتتى.

كەزدەسۋ ناتيجەسىندە تاراپتار ترانسشەكارالىق سۋ وبەكتىلەرىن بىرلەسىپ باسقارۋ جانە پايدالانۋ تۋرالى كەلىسىمدى تالقىلاۋ جونىندە كەڭەس وتكىزۋگە كەلىستى.