ەپيدەميولوگيالىق جاعدايدىڭ سالدارىنان ەلوردا كۇنىنە ارنالعان ءىس-شارالار ونلاين فورماتتا وتەتىن بولدى، ال قالعان بولىگى وتكىزىلمەيدى. ەلوردا كۇنىن مەرەكەلەۋ الەۋمەتتىك جوبالارعا ارنالادى جانە تەك الەۋمەتتىك سيپاتتا بولادى.
بۇل مالىمەتتى نۇر-سۇلتان قالاسى اكىمدىگىنىڭ رەسمي ينتەرنەت-رەسۋرسى تاراتتى، دەپ حابارلايدى Almaty-akshamy.kz.
ەلوردانىڭ باس مەملەكەتتىك سانيتارلىق دارىگەرى سارحات بەيسەنوۆانىڭ قاۋلىسىنا سايكەس، جابىق ورىندار مەن كونسەرت زالدارداعى ءىس-شارالارعا تىيىم سالىنعان. سونداي-اق اشىق اۋاداعى اتتراكسيوننىڭ بارلىق ءتۇرىنىڭ جۇمىسىنا تىيىم سالىنادى.
تولىمدىلىعى 20%-دان اسپايتىن تەاترلاردىڭ، سونداي-اق پتر-تەستتەرى بار جىلجىمالى كونسەرتتەردىڭ جۇمىسىنا عانا رۇقسات ەتىلەدى.
سول سياقتى Ashyq جوباسى نەگىزىندە كارانتيندىك شارالاردى قاتاڭ تۇردە ساقتاي وتىرىپ، اشىق اۋادا وتەتىن ءىس-شارالارعا رۇقسات ەتىلەدى.
مىسالى، 6 شىلدە كۇنى «مۋزارت» ءانسامبلىنىڭ ونلاين-كونسەرتى جوسپارلانعان. ونلاين-ترانسلياسيا بويىنشا بارلىق اقپارات نۇر-سۇلتان قالاسى مادەنيەت باسقارماسىنىڭ Instagram جەلىسىندەگى @ns.madeniet پاراقشاسىندا جاريالانادى.
ەلوردا كۇنىن مەرەكەلەۋ الەۋمەتتىك جوبالارعا ارنالادى جانە تەك الەۋمەتتىك سيپاتتا بولادى. ناقتىراق ايتقاندا، حالىقتىڭ الەۋمەتتىك وسال توپتارى اراسىندا كەزەكتە تۇرعاندارعا باسپانا كىلتىن تابىستاۋ، قۇرىلىسى ۇزاققا سوزىلعان 20-عا جۋىق ءۇيدى اياقتاۋ، «ءوندىرىس» جانە «كوكتال» اۋداندارىنداعى ءىرى دەنە شىنىقتىرۋ-ساۋىقتىرۋ كەشەندەرىنىڭ قۇرىلىسىن اياقتاپ، پايدالانۋعا بەرۋ ءىس-شاراسى وتەدى.
سونىمەن قاتار، كورۋ قابىلەتى بۇزىلعان بالالارعا ارنالعان مامانداندىرىلعان بالاباقشا اشىلادى، 50-دەن استام اۋلانىڭ، 10-عا جۋىق قوعامدىق كەڭىستىكتىڭ قۇرىلىسى اياقتالادى.