قازاقستاندا جاڭادان ەكى تۇرعىن ءۇي باعدارلاماسى ىسكە قوسىلدى. ولاردىڭ ايىرماشىلىعى قانداي؟ باسپانا باعاسىنا ينفلياسيا اسەر ەتە مە؟ بۇل ساۋالداردىڭ جاۋابىن Public Policy Research Center ۇكىمەتتىك ەمەس تالداۋ ورتالىعىنىڭ ديرەكتورى مەرۋەرت ماحمۇتوۆادان سۇراپ كورگەن ەدىك.
«وتاۋ» جۇمىس ىستەيتىن جاستارعا كوبىرەك كوڭىل بولەدى. «وتباسى بانكىنىڭ» ءوتىنىشى بويىنشا جىل سايىن قارىزداردىڭ جارتىسىنان كوبى 35 جاسقا دەيىنگى ازاماتتارعا بولىنەدى. «ناۋرىز» باعدارلاماسى ازاماتتاردىڭ الەۋمەتتىك وسال توپتارىنا ىڭعايلاندىرىلعان»، — دەدى مەرۋەرت ماحمۇتوۆا Kazinform تىلشىسىنە پىكىرىمەن بولىسە وتىرىپ.
ساراپشىنىڭ ايتۋىنشا، «وتاۋ» جانە «ناۋرىز» يپوتەكالىق تۇرعىن ءۇي باعدارلامالارىنىڭ شارتتارى وتە ۇقساس. دەگەنمەن، ولار حالىقتىڭ ءارتۇرلى توپتارىنا ارنالعان.
سونداي-اق، سپيكەر ەكى باعدارلامانىڭ دا زايم مولشەرلەمەسى ينفلياسيا دەڭگەيىنەن تومەن ەكەنىن جانە ونىڭ «وتباسى بانكى» ارقىلى سۋبسيديالاناتىنىن ايتتى.
مەرۋەرت ماحمۇتوۆانىڭ پايىمداۋىنشا، جاڭا مەملەكەتتىك باعدارلامانىڭ ىسكە قوسىلۋى قازاقستانداعى جىلجىمايتىن مۇلىك نارىعىنا ايتارلىقتاي اسەر ەتپەيدى.
ويتكەنى ەلىمىزدە جەڭىلدىكتى يپوتەكا بويىنشا ساتىپ الىنعان پاتەرلەردىڭ ۇلەسى از. بۇعان دەيىن „وتباسى“ بانكىنەن «ناۋرىز» تۇرعىن ءۇي باعدارلاماسىن ىسكە قوسقان سوڭ، ءبىرىنشى جىلى 12 مىڭعا جۋىق قازاقستاندىق باسپانالى بولا الاتىنىن، ال 8 جىل ىشىندە 68 مىڭ ازامات پاتەرلى بولادى دەگەن مالىمدەمە جاساعان.
«بۇل باعدارلامالار تۇرعىن ءۇيسىز ازاماتتارعا راسىمەن كومەكتەسسە، باعدارلامانىڭ قالاي اتالاتىنى ماڭىزدى ەمەس، باستىسى جۇمىس ىستەگەنى»، — دەپ تولىقتىردى ساراپشى.