1 شىلدەدەگى جاعداي بويىنشا، وسى جىلدىڭ باسىنان بەرى 8 867 ادام تاريحي وتانىنا ورالىپ، قانداس مارتەبەسىن العان.
قازاقستانعا كەلگەن قانداستاردىڭ جارتىسىنان كوبى، ياعني 75،5% وزبەكستاننان، 10،4%-ى قحر-دان، 7%-ى تۇركىمەنستاننان، 2،5%-ى موڭعوليادان جانە 4،5%-ى باسقا ەلدەردەن كەلگەندەر بولىپ تابىلادى، دەپ حابارلايدى Almaty-akshamy.kz.
رەسمي مالىمەتتەر بويىنشا، 1991 جىلدان بەرى رەسپۋبليكاعا 1 ميلليون 79،2 مىڭ ەتنيكالىق قازاق ورالعان.
كەلگەن ەتنيكالىق قازاقتار نەگىزىنەن الماتى (29،9%)، تۇركىستان (14،5%)، ماڭعىستاۋ (18،7%) جانە جامبىل (8،0%) وبلىستارىنا، سونداي-اق شىمكەنت (10،7%) قالاسىنا قونىستاندى.
اعىمداعى جىلعى 1 شىلدەدەگى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 55،5%-دى، ەڭبەككە قابىلەتتى جاستان كىشىلەر 25،3%-دى جانە زەينەتكەرلەر 19،2%-دى قۇرايدى.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 10،9%-ىنىڭ جوعارى، 39،3%-ىنىڭ ورتا كاسىبي، 45،9%-ىنىڭ جالپى ورتا ءبىلىمى بار جانە 3،9%-ىنىڭ ءبىلىمى جوق.