ماجىلىستە قازاقستانعا موڭعوليادان قانشا ادام قونىس اۋدارعانىن ايتىلدى، - دەپ حابارلايدى aqshamnews.kz ءتىلشىسى.
بۇگىن ماجىلىستە «قازاقستان رەسپۋبليكاسىنىڭ ۇكىمەتى مەن موڭعوليا ۇكىمەتى اراسىنداعى زەينەتاقى سالاسىنداعى ىنتىماقتاستىق تۋرالى كەلىسىمدى راتيفيكاسيالاۋ تۋرالى» قازاقستان رەسپۋبليكاسى زاڭىنىڭ جوباسى بويىنشا قورىتىندىسى وقىلدى. وندا ەلگە موڭعوليادان كوشكەن قانداستار تۋرالى ايتىلدى.
"ىشكى ىستەر مينيسترلىگىنىڭ دەرەكتەرىنە سايكەس، ءقازىر قازاقستان اۋماعىندا موڭعوليادان تۇراقتى تۇرۋ ءۇشىن قونىس اۋدارعان شامامەن 6600 ازامات تۇرادى. ولاردىڭ ىشىندە 6100ء-ى – تاريحي وتانىنا ورالعان ەتنيكالىق قانداستار. ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەلەرىندەگى مالىمەتتەر بويىنشا، بۇگىنگى تاڭدا قازاقستاندا، سونىڭ ىشىندە تاريحي وتانىنا ورالعان ازاماتتاردى قوسا العاندا، شامامەن 1800 ادامعا زەينەتاقى تولەمدەرى تاعايىندالعان"، - دەدى ەڭبەك جانە حالىقتى الەۋمەتتىك قورعاۋ ءمينيسترىنىڭ مىندەتىن اتقارۋشى ۆيكتوريا شەگاي.
قازاقستان مەن موڭعوليا اراسىنداعى زەينەتاقى سالاسىنداعى ىنتىماقتاستىق تۋرالى كەلىسىم كۇشىنە ەنگەن جاعدايدا، ەڭبەك ءوتىلىن قايتا ەسەپتەۋ شامامەن 400 ازاماتتى قامتيدى.
سونىمەن قاتار، بۇل وزگەرىستەردى ىسكە اسىرۋ ءۇشىن رەسپۋبليكالىق بيۋدجەتتەن قوسىمشا قاراجات ءبولۋ تالاپ ەتىلمەيتىنى اتاپ ءوتىلدى.