قازاقستانعا كوكاين جەتكىزۋ ارناسىنىڭ جولى كەسىلدى

الماتىدا ەسىرتكى قىلمىسىنا قارسى ءىس-قيمىل بولىنىستەرىنىڭ قىزمەتكەرلەرى يتاليا مەن پولشادان قازاقستانعا جەتكىزىلەتىن كوكاين ارناسىنىنىڭ جولىن كەستى.

الماتىدا جالعا الىنعان پاتەردە سالماعى 250 گرامم كوكاين تاركىلەندى. ول كوفە تۇرىندە پلاستيكالىق كاپسۋلالارعا جاسىرىلعان، دەپ حابارلايدى Almaty-akshamy.kz Polisia.kz-كە سىلتەمە جاساپ. 

بۇدان ءارى قازپوشتا بولىمشەسىندە فيگۋرانتقا تيەسىلى سالەمدەمەنى تاركىلەۋ بويىنشا تەرگەۋ شارالارى جۇرگىزىلدى. ودان جالپى سالماعى شامامەن 1 كگ ەسىرتكى زاتتارى بار پلاستيكالىق بانكالار تابىلدى، ونىڭ ىشىندە 0،5 كگ كوكاين جانە 400 گرامنان استام ەكستازي بولعان. بۇل ءۇش مىڭنان استام ءبىر رەتتىك دوزانى قۇرايدى. انىقتالعانداي، ۇستالعان شەتەلدىك كۋرەر فۋنكسياسىن ءۇش ايعا جۋىق ورىنداپ كەلگەن، ال الماتىعا شارۋاشىلىق تاۋار رەتىندە جاسىرىلعان پوشتا سالەمدەمەلەرى ارقىلى ەسىرتكىنىڭ سيرەك تۇرلەرىن ساتۋ ماقساتىندا عانا كەلگەن.

«ۇستالعان ادامعا قاتىستى ەسىرتكى زاتتارىن وتكىزۋ ماقساتىندا اسا ءىرى مولشەردە زاڭسىز ساتىپ الۋ جانە ساقتاۋ فاكتىسى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. ەستەرىڭىزگە سالا كەتەيىك، بۇل قىلمىستار ءۇشىن مۇلكى تاركىلەنىپ، ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلادى. كۇدىكتى قاماۋعا الىندى. ەلگە كوكاين جەتكىزۋ ارنالارىن انىقتاۋ بويىنشا ءىس-شارالار جالعاسىپ جاتىر. وزگە اقپارات تەرگەۋ مۇددەسى ءۇشىن جاريا ەتىلمەيدى»، – دەدى ق ر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى باقىتجان ءامىرحانوۆ.