اقپاننىڭ 12ء-سى مەن ناۋرىزدىڭ 20-سى ارالىعىندا 50-دەن استام ەلدىڭ قاتىسۋىمەن TALIS-2024 ءتورتىنشى سيكلى وتەدى.
وعان 378 قازاقستاندىق مەكتەپتىڭ 8000-عا جۋىق مۇعالىمدەرى مەن ديرەكتورلارى قاتىسادى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
«بۇل سيكلدىڭ ەرەكشەلىگى ءبىلىم بەرۋ جۇيەسىنىڭ قازىرگى ماسەلەلەرى تۋرالى جاڭا سۇراقتاردىڭ قوسىلۋى: ارتۇرلىلىك پەن تەڭدىك، وقۋشىلاردىڭ الەۋمەتتىك جانە ەموسيونالدىق وقۋى، ءبىلىم بەرۋ ماقساتىندا تەحنولوگيالاردى پايدالانۋ جانە قورشاعان ورتا مەن تۇراقتى دامۋ بويىنشا ءبىلىم بەرۋ. زەرتتەۋگە ى. التىنسارين اتىنداعى ۇلتتىق ءبىلىم اكادەمياسىنىڭ، رەسپۋبليكالىق ءبىلىم مازمۇنىن ساراپتاۋ عىلىمي-پراكتيكالىق ورتالىعىنىڭ، «ورلەۋ» باۇو ساراپشىلارى جانە ل.ن. گۋميليەۆ اتىنداعى ەۇۋ وقىتۋشىلارى بىرلەسىپ ازىرلەگەن ۇلتتىق ماسەلەلەر ەنگىزىلەدى» - دەدى ءبىلىم بەرۋ سالاسىنداعى ساپانى قامتاماسىز ەتۋ كوميتەتىنىڭ ءتوراعاسى ەرنۇر داۋەنوۆ.
TALIS-2024 بويىنشا قازاقستاندىق پەداگوگتەردىڭ ناتيجەلەرىنىڭ ەگجەي-تەگجەيلى تالداۋلارى قامتىلعان ۇلتتىق ەسەپ 2026 جىلى جاريالانادى. ناتيجەلەر رەسپۋبليكانىڭ سەگىز ماكرووڭىرى بويىنشا ۇسىنىلادى.
انىقتاما ءۇشىن: قازاقستان TALIS زەرتتەۋىنە 2018 جىلدان بەرى قاتىسىپ كەلەدى. ونىڭ ناتيجەلەرى «پەداگوگ مارتەبەسى تۋرالى» زاڭدى ازىرلەۋ كەزىندە ەسكەرىلدى. TALIS (Teaching and Learning International Survey) ءار التى جىل سايىن ەكونوميكالىق ىنتىماقتاستىق جانە دامۋ ۇيىمىنىڭ قولداۋىمەن وتكىزىلىپ كەلەدى جانە ول ەڭ اۋقىمدى حالىقارالىق زەرتتەۋلەردىڭ بىرىنە اينالعان. زەرتتەۋ ەلىمىزدىڭ پەداگوگيكالىق كورپۋسىنىڭ كۇشتى جانە ءالسىز تۇستارىن انىقتاۋعا جانە مەكتەپتەردەگى پەداگوگتەر مەن ءبىلىم بەرۋ ورتاسىنىڭ جۇمىس جاعدايلارىن تاۋەلسىز باعالاۋعا مۇمكىندىك بەرەدى.