ينۆەستورلارعا قويىلاتىن تالاپتار قايتا قارالدى.
ۇكىمەت وتىرىسىندا قازاقستان رەسپۋبليكاسىنىڭ كوشى-قون ساياساتىنىڭ 2023-2027 جىلدارعا ارنالعان تۇجىرىمداماسىنىڭ جوباسى ماقۇلداندى. قۇجات بويىنشا، الەۋەتتى ينۆەستورلارعا قويىلاتىن تالاپتار قايتا قارالدى، دەپ حابارلايدى Almaty-akshamy.kz Inbusiness.kz سىلتەمە جاساپ.
ءىرى ينۆەستورلارعا 10 جىل مەرزىمگە تۇرۋعا رۇقساتى بار ينۆەستورلىق ۆيزالار بەرىلەدى. سونداي-اق ازاماتتاردى ەڭبەك كۇشى جەتپەيتىن وڭىرلەرگە كوشىپ بارۋىن ىنتالاندىرۋ دا تۇجىرىمدامانىڭ نەگىزگى مىندەتتەرىنىڭ ءبىرى بولىپ تابىلادى. بۇل رەتتە كوشىپ بارعانداردى باسپانامەن، الەۋمەتتىك ينفراقۇرىلىممەن جانە جۇمىسپەن قامتاماسىز ەتۋ الدىن الا پىسىقتالاتىن بولادى.
تاعى ءبىر ماڭىزدى ماسەلە – ول شەتەلدە جۇمىس ىستەيتىن قازاقستاندىقتاردىڭ قۇقىقتارىن قورعاۋ.
"ءبىزدىڭ وتانداستارىمىزعا زاڭگەرلىك جانە كونسۋلتاسيالىق كومەك كورسەتىلەتىن بولادى. ول ءۇشىن قازاقستاندىق ازاماتتار كوپ جۇمىس ىستەيتىن ەلدەرمەن ەكىجاقتى كەلىسىمدەر جاسالاتىن بولادى. قاي ەلدە ەڭبەك ەتسە دە، ءبىز ءوز ازاماتتارىمىزدى قورعاي الۋىمىز كەرەك"، — دەدى پرەمەر-مينيستر.
ونىڭ ايتۋىنشا، تۇجىرىمدامادا "ءبىر تەرەزە" قاعيداتى بويىنشا ميگرانتتاردىڭ قوزعالىسىن ەسەپكە الۋدىڭ ءبىرىڭعاي اقپاراتتىق جۇيەسىن قۇرۋ كوزدەلگەن.
ۇسىنىلعان تۇجىرىمدامانى بەكىتۋ بويىنشا داۋىس بەرۋ راسىمىنەن كەيىن ءاليحان سمايىلوۆ تۇجىرىمداماداعى باستامالاردى زاڭ جۇزىندە ۋاقىتىلى بەكىتۋدى قامتاماسىز ەتۋدى جانە كوشى-قون پروسەستەرىن اۆتوماتتاندىرۋ ءۇشىن اقپاراتتىق جۇيەلەردى دامىتۋ شارالارىن قابىلداۋدى تاپسىردى.
سونىمەن قاتار پرەمەر-مينيستر ءوڭىر اكىمدىكتەرى شەتەلدىك مامانداردى تارتۋ ءۇشىن كۆوتا بەلگىلەۋ كەزىندە سول وڭىرگە ەڭ قاجەتتى كادرلاردىڭ كەلۋىن قامتاماسىز ەتۋى جانە ولاردىڭ جۇمىسىنا باقىلاۋدى كۇشەيتۋى ءتيىس ەكەنىن اتاپ ءوتتى.