بۇل سوتقا دەيىنگى تەرگەۋدى جەڭىلدەتەدى.
پارلامەنت سەناتىندا «سوت جۇيەسىن رەفورمالاۋدى زاڭنامالىق قامتاماسىز ەتۋ» ماسەلەسى تالقىلانىپ جاتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قوعامدا وسى سالاداعى وزگەرىستەرگە دەگەن سۇرانىستىڭ جوعارى ەكەنى بەلگىلى. مەملەكەت باسشىسى ناۋرىز ايىنداعى جولداۋىندا بارلىق دەڭگەيدەگى سوتتار، شىن مانىندە، تاۋەلسىز، اشىق جانە كاسىبي بولماسا، زاڭ ۇستەمدىگىن قامتاماسىز ەتۋ مۇمكىن ەمەس ەكەنىن ايرىقشا اتاپ ءوتتى. سوڭعى ۋاقىتتا بۇل باعىتتا اۋقىمدى جۇمىس اتقارىلدى. دەگەنمەن، شەشىمىن تاپپاعان ماسەلەلەر دە از ەمەس»، - دەدى ق ر پارلامەنتى سەناتىنىڭ ءتوراعاسى ماۋلەن اشىمبايەۆ ءوزىنىڭ كىرىسپە سوزىندە.
ونىڭ ايتۋىنشا، قاسىم-جومارت توقايەۆ ءوزىنىڭ سايلاۋالدى باعدارلاماسىندا وبەكتيۆتى جانە تاۋەلسىز سوت ادىلەتتى مەملەكەتتىڭ نەگىزى ەكەنىن اتاپ كورسەتتى.
پرەزيدەنت تاپسىرماسىنا سايكەس، سەنات جانىنان سوت جۇيەسىن جەتىلدىرۋگە ارنالعان باستامالاردى پىسىقتاۋ جونىندە جۇمىس توبى قۇرىلدى.
ونىڭ قۇرامىندا جوعارعى سوتتىڭ، مەملەكەتتىك ورگانداردىڭ، جانە قوعامدىق ۇيىمداردىڭ وكىلدەرى مەن ساراپشىلار بار.
«جۇمىس توبىنا رەفورمالار اياسىندا ناقتى تەتىكتەردى ازىرلەۋ جانە ءتيىستى زاڭ جوباسىن دايىنداۋ مىندەتى جۇكتەلدى. ءبىزدىڭ بۇگىنگى جيىنىمىزدىڭ باستى ماقساتى – سول جۇمىس توبى ازىرلەگەن ۇسىنىستاردى تالقىلاۋ جانە ولاردى ءارى قاراي جەتىلدىرۋ»، - دەدى سەنات ءتوراعاسى.
سونىمەن بىرگە، بۇگىن قارالىپ جاتقان ۇسىنىستاردىڭ نەگىزىندە جوعارعى سوتتىڭ باستامالارى جاتىر، بۇل باستامالار مۇددەلى مەملەكەتتىك ورگانداردىڭ قاتىسۋىمەن سەناتتا پىسىقتالعان.
«جالپى، جۇمىس توبى سوت جۇيەسىن رەفورمالاۋ بويىنشا ماڭىزدى، وزەكتى ۇسىنىستار دايىندادى دەپ ويلايمىن. بۇگىن ءبىز قاراستىراتىن نارسە – سوت جۇيەسىن جاڭعىرتۋ جونىندەگى ۇسىنىستاردىڭ ءبىر بولىگى عانا. وسىلايشا، سۋديالارعا كۇش قۇرىلىمدارىنىڭ قىسىمىن تومەندەتۋ مەن قىلمىستىق پروسەستە باسەكەلەستىكتى دامىتۋ تەتىكتەرى پىسىقتالدى. قىلمىستىق تەرىس قىلىقتار تۋرالى ىستەردى بولەك وڭايلاتىلعان ءىس جۇرگىزۋگە ءبولۋ ۇسىنىلادى. بۇل سوتقا دەيىنگى تەرگەۋدى جەڭىلدەتەدى، تەرگەۋشىلەرگە، پروكۋرورلار مەن سۋديالارعا جۇكتەمەنى ايتارلىقتاي ازايتادى. تۇتاستاي العاندا، ىستەردىڭ جەكەلەگەن ساناتتارى بويىنشا سوت تالقىلاۋلارىنىڭ جارىسپالىلىعىن كەزەڭ-كەزەڭىمەن، 5 جىل ىشىندە دامىتۋ ۇسىنىلادى»، - دەدى ماۋلەن اشىمبايەۆ.