بيىلعى ءوسىم 2،8 پايىز بولۋى مۇمكىن.
ەۋرازيالىق دامۋ بانكى 2023 جىلعا ارنالعان ماكروەكونوميكالىق بولجام مالىمەتتەرىن تانىستىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازاقستان ەكونوميكاسى 2022 جىلى ىشكى جانە سىرتقى جاعدايلارعا توزىمدىلىك تانىتتى. بۇعان سالىق جانە بيۋدجەت ساياساتى باعىتىنداعى ءىس-شالالار ىقپال ەتتى. ءبىزدىڭ باعالاۋىمىزعا قاراعاندا، بيىلعى ءوسىم 2،8 پايىز بولۋى مۇمكىن. قازىرگى احۋالدى ەسكەرسەك، بۇل كورسەتكىش ايتارلىقتاي جاقسى دەڭگەيدە. بازالىق جاعدايدا 2023 جىلى ەكونوميكا ءوسىمى 4،2 پايىزعا دەيىن قارقىن الادى دەپ ەسەپتەيمىز»، - دەدى اناليتيكالىق جۇمىس ديرەكسياسىنىڭ ەلدەر بويىنشا تالداۋ جۇرگىزۋ ورتالىعىنىڭ اعا تالداۋشىسى ايگۇل بەردىعۇلوۆا ونلاين تانىستىرىلىم كەزىندە.
ونىڭ ايتۋىنشا، ەۋرازيالىق دامۋ بانكى قازاقستاندا سالىق ءارى بيۋدجەت ساياساتى تۇرعىسىندا قولداۋ جاساۋ قادامدارى جالعاسادى دەپ سانايدى. وڭدەۋ ونەركاسىبىندە، قۇرىلىس سەكتورىندا جانە قىزمەت كورسەتۋ سالاسىندا، ونىڭ ىشىندە 10 ۇلتتىق جوبانى ىلگەرىلەتۋ اسەرىنەن ءونىم كولەمى وسەدى. كەلەسى جىلداعى ءوسىمنىڭ نەگىزگى درايۆەرى تەڭىز كەن ورنىندا جاڭا قۋاتتاردى ىسكە قوسۋعا قاتىستى بولىپ وتىر. سونىمەن قاتار كاسپيي قۇبىر كونسورسيۋمى تولىق رەجيمدە جۇمىس ىستەيدى.
ايگۇل بەردىعۇلوۆانىڭ سوزىنە قاراعاندا، 2024 جىلى قازاقستان ەكونوميكاسىنىڭ ءوسىمى دە بىرتىندەپ ارتىپ، ءوسۋ قارقىنى 4،4 پايىزدى قۇراۋى مۇمكىن.
بۇدان بۇرىن حابارلانعانداي، 2023 جىلى ءبىر اقش دوللارى 486 تەڭگە شاماسىندا بولۋى ىقتمال.