تۋريزم جانە سپورت ءمينيسترى ەرمەك مارجىقپايەۆ ماجارستان استاناسى بۋداپەشتتە وتكەن WKF كاراتەدەن الەم چەمپيوناتىندا ەلىمىزدىڭ كوك تۋىن بيىكتە جەلبىرەتىپ، قازاقستانعا تاريحي التىن جۇلدەنى سىيلاعان ءمولدىر جاڭبىرباي مەن الەم بىرىنشىلىگىنىڭ قولا جۇلدەگەرى ديدار ءامىرالىنى قابىلداپ، پرەزيدەنتتىڭ ارنايى العىس حاتىن تابىستادى، دەپ حابارلايدى Almaty-akshamy.kz.
تۋريزم جانە سپورت مينيسترلىگى سايتىنىڭ مالىمەتىنشە، كەزدەسۋ بارىسىندا مينيستر سپورتشىلاردىڭ الەم چەمپيوناتىنداعى جەتىستىكتەرىن جوعارى باعالاپ، الداعى ۋاقىتتا دا ەل نامىسى سىنالاتىن ماڭىزدى تۋرنيرلەردە تابىستى ونەر كورسەتۋىنە تىلەكشى ەكەنىن جەتكىزدى.
«كەيىنگى جىلدارى ەلىمىزدە كاراتە سپورتى قارقىندى دامىپ كەلە جاتىر. بۇعان سىزدەردىڭ قوسىپ جۇرگەن ۇلەستەرىڭىز وراسان زور. جۋىقتا قىتايدىڭ حانچجوۋ قالاسىندا ۇيىمداستىرىلعان جازعى ازيا ويىندارىندا ەكەۋىڭىز دە جۇلدەگەرلەر قاتارىنان كورىنىپ، جانكۇيەرلەردى قۋانىش پەن شاتتىققا بولەدىڭىزدەر. ەندى مىنە، ارادا كوپ ۋاقىت وتپەي الەم بىرىنشىلىگىندە دە تۇعىردىڭ ەڭ بيىك ساتىسىنان كورىندىڭىزدەر. سىزدەرگە الداعى ۋاقىتتا دا ەل نامىسى سىنالاتىن ماڭىزدى تۋرنيرلەردە تابىس تىلەيمىن»، - دەدى ەرمەك مارجىقپايەۆ.
ايتا كەتەيىك، ماجارستانداعى الەم چەمپيوناتىنىڭ فينالىندا ءمولدىر جاڭبىرباي (50 كگ) يتاليالىق ەرمينيا پەرفەتتوعا ەش مۇمكىندىك بەرمەي، التىن تۇعىرعا كوتەرىلسە، 67 كگ-عا دەيىنگى سالماقتا ەل نامىسىن قورعاعان ديدار ءامىرالى ءۇشىنشى ورىن ءۇشىن وتكەن باسەكەدە يوردانيا سپورتشىسى افيف گايتتى جەڭىپ، قولا مەدالعا قول جەتكىزگەن-دى.