قىزاناق تۇركىمەنستان، وزبەكستان جانە يران ەلدەرىنەن جەتكىزىلگەن.
تۇركىستان وبلىسىندا شەتتەن جەتكىزىلگەن 43 توننا قىزاناقتان ۆيرۋس انىقتالدى، -دەپ حابارلايدى اlmaty-akshamy.kz qazaqstan.tv تەلەارناسىنا سىلتەمە جاساپ.
ءونىم سارىاعاشتاعى شەكارا بەكەتىندە تەكسەرىلگەن. فيتوسانيتاريالىق باقىلاۋ ينسپەكتورلارى تومات ونىمدەرىنەن «قىزاناق جەمىسىنىڭ قوڭىر قاتپارلى ۆيرۋسى» مەن «قىزاناقتىڭ قولا تۇستەس توسپو ۆيرۋستارىن» تاپقان.
«وسىمدىكتەر كارانتينى زاڭ تالاپتارىنا سايكەس، جۇك يەلەرىنە اكىمشىلىك ءىس شارالار قارالىپ، كەرى قايتارىلدى. جالپى بۇل اۋرۋلار رەسپۋبليكا اۋماعىنا ەنەتىن بولسا، قىزاناق، ءتاتى بۇرىش، بايالدى ونىمدەرىمەن اينالىساتىن كاسىپكەر فەرمەرلەردىڭ جىلىجايلارىنا جانە اشىق القاپتا وسىرىلگەن ونىمدەرگە 50-70 پايىزعا دەيىن ەلەۋلى زيان كەلتىرەدى»، دەيدى وبلىستىق اۋماقتىق ينسپەكسياسىنىڭ باسشىسى يبراگيم بەگاسيلوۆ.
ينسپەكتورلاردىڭ سوزىنشە، تومات ونىمدەرىنىڭ مۇنداي ءقاۋىپتى ۆيرۋسى سوڭعى ءۇش جىلدا ەۋروپا، ازيا مەن امەريكادا تاراعان.
سونىمەن قاتار يران، وزبەكستان، تۇركىمەنستان ەلدەرىندە دە انىقتالىپ وتىر. وسىنداي كارانتيندىك اۋرۋلاردىڭ ەنگىزىلۋى مەن ءونىمدى زيانكەستەردەن قورعاۋ ماقساتىندا تەكسەرىستەر ءجىتى جۇرگىزىلىپ كەلەدى.