قىركۇيەك ايىندا وتكەن ءىس-شارالاردىڭ ناتيجەسىندە قازاقستانعا 2024 جىلعى 1-13 قىركۇيەك ارالىعىندا كەلگەن شەتەلدىك تۋريستەر سانى 597 مىڭعا جەتتى. ونىڭ 68 مىڭى ەلىمىزگە استانا جانە الماتى حالىقارالىق اۋەجايلارى ارقىلى، قالعاندارى اۆتو جانە تەمىر جول كولىگىمەن كەلگەن، دەپ حابارلايدى aqshamnews.kz.
شەتەلدىك تۋريستەر سانىنىڭ كوبەيۋىنە ىقپال ەتكەن نەگىزگى فاكتورلار – دۇنيەجۇزىلىك كوشپەندىلەر ويىنىنىڭ ءوتۋى مەن تانىمال ءانشى ديماش قۇدايبەرگەننىڭ كونسەرتى. اتالمىش شارالارعا 89 مەملەكەتتىڭ ازاماتتارى كەلگەن.
«شەتەلدىك قوناقتار نەگىزىنەن جۇڭگو، رەسەي، ءۇندىستان جانە گەرمانيا سىندى مەملەكەتتەردەن كەلدى. مىسالى، قىتايدان 8 مىڭنان استام، ءۇندىستاننان 6 مىڭنان استام، گەرمانيادان 4 مىڭنان استام ءتۋريستتىڭ قازاقستانعا كەلۋى تىركەلگەن. البەتتە، بۇل دەرەكتەر قازاقستانعا تۋريستىك باعىت رەتىندە قىزىعۋشىلىقتىڭ ارتىپ كەلە جاتقانىن كورسەتەدى»،- دەپ اتاپ ءوتتى تۋريزم جانە سپورت ۆيسە-مينيسترى ەرجان ەركىنبايەۆ.
ۆيسە-مينيستردىڭ سوزىنشە، تۋريستەردىڭ ەداۋىر بولىگى گەرمانيا، وزبەكستان، تۇركيا، قىرعىزستان، اقش جانە وڭتۇستىك كورەيادان كەلگەن.
EQonaq جۇيەسى استانادا 12 400-گە جۋىق شەتەلدىك تۋريست تىركەدى. ولاردىڭ تۇرۋعا، كولىككە، تاماقتانۋعا جانە ويىن-ساۋىققا جۇمساعان جالپى شىعىندارى 15،5 ملن اقش دوللارىن نەمەسە 7،5 ملرد تەڭگەنى قۇراعان. الىس شەتەلدەن كەلگەن تۋريستەردىڭ ورتاشا شىعىنى 1500 دوللاردىڭ شاماسىندا. دەمەك، دۇنيەجۇزىلىك كوشپەندىلەر ويىندارىنا كەلۋشىلەر ەل ەكونوميكاسىنا قوسىمشا 625 مىڭ اقش دوللار قوسقان.
ايتا كەتۋ كەرەك، ەلوردانىڭ تانىمال تۋريستىك نىساندارىنا 7-13 قىركۇيەك ارالىعىندا كەلۋشىلەر سانى ارتقان. قازاقستاننىڭ ۇلتتىق مۋزەيى 14 مىڭنان استام ادامدى قابىلداپ، «استانا-بايتەرەك» مونۋمەنتىنە 15 مىڭعا جۋىق تۋريست، ال «نۇر-الەم» پاۆيلونىنا 10 مىڭعا جۋىق ادام كەلگەن.
حالىقارالىق دەڭگەيدەگى مادەني-سپورتتىق ءىس-شارا بولىپ تابىلاتىن كوشپەندىلەردىڭ دۇنيەجۇزىلىك ويىندارى قازاقستاننىڭ تۋريستىك ءيميدجىن نىعايتۋ ءۇشىن ەلەۋلى ۇلەس قوستى. كوشپەندىلەر ويىنىنىڭ ۇيىمداستىرۋ كوميتەتىنىڭ مالىمەتىنشە، ەتنواۋىل مەن ويىنداردىڭ ءوزىن كورۋگە 250 مىڭنان استاپ ادام كەلگەن.