قازاقستانعا ءبىر تۋريستەن قانشا تابىس تۇسەدى؟

ءار شەتەلدىك تۋريست 2 جۇمىس ورنىن اشۋعا سەپ بولادى.

قازاقستانعا الىس شەت ەلدەن كەلگەن ءاربىر تۋريست ورتا ەسەپپەن 1500 دوللار تابىس اكەلەدى، دەپ حابارلايدى Almaty-akshamy.kz مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

بىلتىر تۋريستىك قىزمەتتەردەن ەل قازىناسىنا رەكوردتىق 389 ملرد تەڭگە سالىق تۇسكەن.

ۇلتتىق بانكتىڭ دەرەگىنە سايكەس قازاقستانعا الىس شەت ەلدەن كەلگەن 1 تۋريست ورتا ەسەپپەن 1500 دوللار مولشەرىندە تابىس اكەلەدى.

"ەلىمىزدە سوڭعى ەكى جىلدا تۋريزم سالاسىندا جۇمىس ىستەيتىندەردىڭ سانى ايتارلىقتاي ءوسىپ، 500 مىڭعا جۋىقتادى. مادەنيەت جانە سپورت مينيسترلىگى 2029 جىلعا دەيىن تۋريزم سالاسىندا 800 مىڭعا جۋىق ادامدى جۇمىسپەن قامتۋدى جوسپارلاپ وتىر"،- دەدى مادەنيەت جانە سپورت ۆيسە-مينيسترى ەرجان ەركىنبايەۆ.

مينيسترلىكتىڭ اقپاراتىنشا، بىلتىر ەلىمىزگە 1 ميلليونعا جۋىق شەتەلدىك تۋريست كەلگەن. ناتيجەسىندە تۋريستىك قىزمەتتەن تۇسكەن سالىق مولشەرى 389 ميلليارد تەڭگەگە دەيىن جەتىپ، رەكوردتىق ناتيجە تىركەلدى. ونىڭ ىشىندە ەلىمىزدەگى ورنالاستىرۋ ورىندارى 183 ملرد تەڭگە تابىس تاپتى.