بۇل – 2022 جىلعى كورسەتكىشكە قاراعاندا 225 مىڭ ادامعا كوپ.
ياعني، 2022 جىلدىڭ وسى كەزەڭىمەن سالىستىرعاندا ءوسىم 37%-عا ارتقان، دەپ حابارلايدى Almaty-akshamy.kz ۇلتتىق ستاتيستيكا بيۋروسىنا سىلتەمە جاساپ.
بيۋرو مالىمەتىنشە، 2023 جىلدىڭ قاڭتار-قىركۇيەك ارالىعىندا ەلىمىزگە 834،9 مىڭ شەتەلدىك تۋريست ساياحاتتاعان. ال 2022 جىلى ەلىمىزگە 609،8 مىڭ شەتەلدىك كەلگەن.
ستاتيستيكالىق مالىمەتتەر بويىنشا، ەلىمىزگە ساياحاتتايتىن شەتەلدىك تۋريستەردىڭ گەوگرافياسى جىل ساناپ ارتىپ كەلەدى. ماسەلەن، قازاقستانعا جاقىن كورشىلەرىمىزدەن بولەك، مۇحيتتىڭ ارعى بەتىندەگى مەملەكەتتەردىڭ دە ساياحتاشىلارى كوپتەپ كەلە باستادى. وسى ورايدا، نازارلارىڭىزعا 2023 جىلدىڭ قاڭتار-قىركۇيەك ارالىعىندا ەلىمىزگە ساياحاتتاعان توپ-5 ەلدىڭ تۋريستەر سانىن ۇسىنامىز.
2023 جىلدىڭ العاشقى 9 ايىندا ەلىمىز بويىنشا ەڭ كوپ ساياحاتشى – رەسەي فەدەراسياسىنان كەلگەن. بىلتىرعى قاڭتار-قىركۇيەك ارالىعىندا قازاقستانعا 356 850 مىڭ رەسەيلىك ساياحاتتاعان. ەكىنشى ورىندى جۇڭگو تۋريستەرى يەلەندى. شىعىستاعى كورشىمىزدەن ەلىمىزگە 75 131 ادامنىڭ تابانى تيگەن. ال ءۇشىنشى ساتىعا تۇركيا تۋريستەرى تۇراقتادى. انادولى ەلىنەن 41 134 تۋريست كەلگەن. سونداي-اق ۇزدىك بەستىكتىڭ قاتارىنا ءۇندىستان (34 757) جانە اقش (28 160) ساياحاتشىلارى ەندى.
«جىل سايىن شەتەلدىك تۋريستەردىڭ قازاقستانعا دەگەن قىزىعۋشىلىعى ارتا باستاعانىن بايقاپ وتىرمىز. ماسەلەن، 2022 جىلى ەلىمىزگە 900 مىڭنان اسا شەتەلدىك ساياحاتشى، ال وتكەن جىلدىڭ 9 ايىندا 800 مىڭنان اسا شەتەلدىك قوناق كەلگەن. بيىل بۇل كورسەتكىش بۇدان دا كوبەيە تۇسەدى دەگەن سەنىمدەمىز. ويتكەنى ەلىمىزدە شەتەلدىكتەردى تاڭقالدىراتىن، سۇلۋلىعىمەن وزىنە تارتاتىن، كورسە كوز توياتىن كورىكتى جەرلەر، تابيعات سىي ەتىپ بەرگەن سۇلۋ مەكەندەر از ەمەس. سونىمەن قاتار مينيسترلىك بايتاق جەرىمىزگە تابانى تيگەن ءاربىر ساياحاتشىعا ۇمىتىلماس اسەر قالدىرۋ ءۇشىن جۇمىس ىستەپ جاتىر»، - دەپ اتاپ ءوتتى تۋريزم جانە سپورت ءمينيسترىنىڭ ورىنباسارى ەرجان ەركىنبايەۆ.