الماتىداعى جىلدىڭ مادەني وقيعالارى: 334 كونسەرت، 1،6 ميلليوننان استام كەلۋشىلەر مەن الەمدىك دەڭگەيدەگى جۇلدىزدار
2023 جىلى الماتىدا 334 اۋقىمدى كونسەرت ءوتىپ، ولارعا 1،6 ميلليوننان استام ادام كەلگەن. قالا الاڭدارىندا، ستاديونداردا جانە ارەنالاردا قازاقستاننىڭ بەلگىلى ارتيستەرى عانا ەمەس، الەمدىك دەڭگەيدەگى جۇلدىزدار دا ونەر كورسەتتى. ولاردىڭ اراسىندا 50 Cent، Akon، Lara Fabian، Ne-Yo، تاركان، Outlandish، Arash جانە باسقا دا كوپتەگەن ءانشى بار. ايتپاقشى، وتكىزىلگەن ءىس-شارالاردىڭ 86%-ىن كوممەرسيالىق جانە جەكە كومپانيالار ۇيىمداستىرعان.
«شىنىندا دا، 2023 جىل مادەني ءىس-شارالارعا تولى بولدى، قالامىزدا كوپتەگەن تانىمال ارتيست كەلدى. ەگەر قورىتىندىلاساق، الماتىدا شەتەلدىك انشىلەردىڭ 47 كونسەرت جانە وتاندىق ارتيستەر 287 كونسەرت قويعان. بۇعان قوسا، اۋقىمدى ءىس-شارالار، سونىڭ ىشىندە حالىقارالىق فەستيۆالدار وتكىزدىك. تۇجىرىمدامالىق تۇرعىدان قاراستىرساق، وندا ءبىزدىڭ ءاربىر ءىس-شارامىز جەكە برەندكە اينالىپ، ءوز كورەرمەندەرىن تارتادى. قالا اكىمى مادەني استانامىز تۇرعىندار مەن قوناقتاردى قىزىقتى جوبالارمەن قۋانتىپ، وقيعالى ءتۋريزمدى دامىتۋعا جاعداي جاساۋ مىندەتىن قويىپ وتىر»، - دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
ايتا كەتەيىك، 2023 جىلى 19 جىلدىق ۇزىلىستەن كەيىن «ازيا داۋىسى» حالىقارالىق مۋزىكالىق فەستيۆالى ءوتتى. ءىس-شارا ياسىندا وتاندىق ورىنداۋشىلار دا، الەمدىك دەڭگەيدەگى شەتەلدىك ارتيستەر دە ءۇش كۇن بويى ونەر كورسەتتى. فەستيۆالدىڭ حەدلاينەرى ايگىلى امەريكاندىق The Black Eyed Peas توبى بولدى. سونىمەن قاتار، بىلتىر The Spirit of Tengri زاماناۋي ەتنيكالىق مۋزىكا فەستيۆالى، سونىمەن بىرگە، «ناۋرىز فەست»، «الماتى، ليۋبليۋ تەبيا»، «تۋعان كۇنىڭمەن، الماتى»، «ساعىندىم الماتىمدى» جانە «زيمنيي نوۆوگودنيي فەستيۆال» ءوتتى. بارلىق فەستيۆال مەگاپوليس تۇرعىندارى مەن قوناقتارىنىڭ كوڭىلىنەن شىقتى.
«مەگاپوليستە اۋقىمدى ءىس-شارالاردى وتكىزۋ وڭ ەكونوميكالىق اسەر ەتەدى. بۇل جاڭا ۋاقىتشا جۇمىس ورىندارىن قۇرۋ، كوپتەگەن تۋريست تارتۋ، وقيعالى ءتۋريزمدى، قوناق ءۇي بيزنەسىن، مەيرامحانالار مەن جەرگىلىكتى بيزنەستى دامىتۋ. ەڭ باستىسى، جاس ارتيستەرگە بەلگىلى جۇلدىزدارمەن ءبىر ساحنادا ونەر كورسەتۋ مۇمكىندىگى، بۇل ولاردىڭ اۋديتورياسىن كەڭەيتۋگە، ونەرىن ۇشتاۋعا سەپتىگىن تيگىزەدى. ءبىز بارلىق ارتيستەر مەن ءىس-شارالاردى ۇيىمداستىرۋشىلارعا 2023 جىلى بىرلەسىپ جۇمىس ىستەگەندەرى ءۇشىن العىس ايتامىز جانە كورەرمەندەر ءۇشىن 2024 جىلعا ارنالعان مادەني مازمۇندى باعدارلاما دايىنداپ جاتىرمىز»، - دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
بۇعان قوسا، وتكەن جىلى مادەنيەت باسقارماسى Open air فورماتىندا ءىس-شارالار – فەستيۆالدار، كورمەلەر مەن كونسەرتتەر ۇيىمداستىردى. بۇل تەك ورتالىق الاڭداردى عانا ەمەس، سونىمەن قاتار ءار اۋداندى دا قامتىدى. وسىلايشا، قالا تۇرعىندارى ءۇشىن كونسەرتتەرگە تەگىن بارۋ مۇمكىندىگى قوسىمشا جاسالدى.
