ق. شارلاپايەۆ: اقمولا جانە باتىس قازاقستان وبلىستارىندا سۋ تاسقىنىنان زارداپ شەككەن ازاماتتارعا ارنالعان قالعان 104 ءۇي قىركۇيەك ايىنىڭ سوڭىنا دەيىن تاپسىرىلادى
پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ونەركاسىپ جانە قۇرىلىس ءمينيسترى قانات شارلاپايەۆ سۋ تاسقىنىنان زارداپ شەككەن قازاقستاندىقتارعا ارنالعان 2576 ءۇيدىڭ قۇرىلىسى اياقتالعانىن حابارلادى. ولاردى سالۋ جۇمىستارى مامىر ايىنىڭ سوڭىندا باستالىپ، 4 اي ىشىندە اياقتالدى.
ماسەلەن، سولتۇستىك قازاقستان، اقتوبە، قوستاناي جانە اتىراۋ وبلىستارىندا سۋ تاسقىنىنان زارداپ شەككەندەرگە ارنالعان ۇيلەردىڭ قۇرىلىسى 100% اياقتالدى. قۇرلىسى جۇمىسى اقمولا (38 ءۇي) جانە باتىس قازاقستان وڭىرلەرىندە (66 ءۇي) جالعاسۋدا. جاڭا ۇيلەردى قىركۇيەك ايىنىڭ سوڭىندا تاپسىرۋ جوسپارلانىپ وتىر.
كوكتەمگى سۋ تاسقىنى سالدارىنان قازاقستاندا بارلىعى 17 603 ءۇي زارداپ شەكتى، ونىڭ 8 447ء-سى كەيىننەن اپاتتى دەپ تانىلدى.
مەملەكەت جاڭا ۇيلەر سالۋدان بولەك، قايتالاما نارىقتا 5 767 بىرلىك تۇرعىن ءۇي ساتىپ الدى.