قارجىلىق اۋدارىم جۇيەسى ارقىلى شەتەلدەن قازاقستان رەسپۋبليكاسىنا كەلەتىن قاراجات كولەمى ايتارلىقتاي ازايعان.
اعىمداعى جىلدىڭ قاڭتار ايىندا شەتەلدەن قازاقستان رەسپۋبليكاسىنا قارجىلىق اۋدارىم جۇيەسى ارقىلى جىبەرىلگەن قاراجات كولەمى 13،6 ملرد تەڭگەنى قۇرادى، بۇل 2021 جىلدىڭ قاڭتارىمەن سالىستىرعاندا 30،5%-عا از، دەپ حابارلايدى Almaty-akshamy.kz Finprom.kz سايتىنا سىلتەمە جاساپ.
سايكەس كەزەڭدەگى بۇل كورسەتكىش ءۇشىنشى جىل قاتارىنان تومەندەپ كەلەدى.
شەتەلدەن قازاقستان رەسپۋبليكاسىنا قارجىلىق اۋدارىم جۇيەسى ارقىلى اۋدارىلعان قارجىنىڭ ۇشتەن ەكىسىنە جۋىعى اقش دوللارىمەن جىبەرىلگەن (2022 جىلعى قاڭتاردا – جالپى اۋدارىم كولەمىنىڭ 63،9%-ى). ودان كەيىنگى ورىندا تۇرعان ۇلتتىق ۆاليۋتا – تەڭگەمەن جاسالعان اۋدارىمدار جالپى اۋدارىم كولەمىنىڭ 25%-ن قۇرادى. ال رۋبلمەن جاسالعان اۋدارىمدار ۇلەسى ءتورتىنشى جىل قاتارىنان ازايىپ كەلەدى؛ 2022 جىلدىڭ قاڭتارىندا ول نەبارى 6،1%-دى قۇرادى، ەۋرونىڭ ۇلەسى 4،9%-دى قۇرادى.
اقش ۆاليۋتاسىمەن الىنعان ءبىر اۋدارىم بويىنشا ورتاشا چەك ءبىر جىل ىشىندە 780 دوللاردان 758 دوللارعا دەيىن تومەندەدى. تەڭگەدەگى ءبىر اۋدارىم بويىنشا ورتاشا چەك، كەرىسىنشە، 127،7 مىڭنان 190،9 مىڭ تەڭگەگە دەيىن ءوستى. رەسەي ۆاليۋتاسىنداعى ءبىر اۋدارىم بويىنشا ورتاشا چەك تە– 22،5 مىڭنان 23،6 مىڭ رۋبلگە دەيىن ءوستى. ەۋروۆاليۋتاداعى ءبىر اۋدارىمنىڭ ورتاشا چەگى 436 ەۋرودان 400 ەۋروعا دەيىن تومەندەدى.
2022 جىلدىڭ قاڭتارىندا قازاقستان رەسپۋبليكاسىنا قارجىلىق اۋدارىم جۇيەسى ارقىلى جىبەرىلگەن اقشانىڭ ەڭ كوپ كولەمى وزبەكستاننان جونەلتىلگەن – جالپى سوماسى 2،5 ملرد تەڭگە.
ودان كەيىنگى ورىنداردا وڭتۇستىك كورەيا (2،1 ملرد تەڭگە) جانە اقش (1،9 ملرد تەڭگە) تۇر. بۇعان دەيىن كوش باستاپ كەلگەن رەسەي 2022 جىلدىڭ قاڭتارىندا نەبارى 1،6 ميلليارد تەڭگە اۋدارىممەن ءتورتىنشى ورىنعا يە بولدى.
