ەلدەگى زەينەتكەرلەردىڭ سانى 2 ملن 268 مىڭ ادامدى قۇرايدى.
قازاقستان ۇكىمەتى جىل باسىنان بەرى قازاقستاندىقتارعا 2،4 ترلن تەڭگەدەن استام سوماعا زەينەتاقى تولەنگەنىن جەتكىزدى، دەپ حابارلايدى Almaty-akshamy.kz.
«بيىلعى جىلدىڭ 10 ايىندا قازاقستاندىقتارعا 2،4 ترلن تەڭگەدەن استام سوماعا زەينەتاقى تولەندى. 2022 جىلعى قازاندا رەسپۋبليكالىق بيۋدجەتتەن زەينەتاقى تولەمدەرىنە 245،1 ملرد تەڭگە، ونىڭ ىشىندە بازالىق زەينەتاقىنى تولەۋگە – 74،6 ملردتەڭگە، ىنتىماقتى زەينەتاقىنى تولەۋگە – 170،5 ملرد تەڭگە ءبولىندى»،- دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
2022 جىلعى 1 قاراشاداعى جاعداي بويىنشا زەينەتكەرلەر سانى – 2 ملن 268 مىڭ ادام.
2022 جىلعى 1 قاراشاداعى جاعداي بويىنشا زەينەتاقى تولەمدەرىنىڭ ورتاشا مولشەرى (بازالىق زەينەتاقى تولەمىن ەسكەرە وتىرىپ) 108 993 تەڭگە بولدى.
2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ، ءار الۋشىعا جەكە تاعايىندالاتىنىن ەسكە سالامىز.
بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى (بۇدان ءارى – مزج) تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى.
ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا، سونداي-اق ەگەر مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 54%-ىن قۇرايدى، سودان كەيىن 10 جىلدان اسقان ءار جىل ءۇشىن ونىڭ مولشەرى 2%-عا ارتادى. مىسالى، ەگەر ءسىزدىڭ ءوتىلىڭىز 20 جىل بولسا، بازالىق زەينەتاقى تومەنگى كۇنكورىس دەڭگەيىنىڭ 74%-ىن، ال 30 جىل بولسا، وندا 94%-ىن قۇرايدى. ەڭبەك ءوتىلى 33 جىل نەمەسە ودان كوپ بولسا، كۇنكورىس دەڭگەيىنىڭ ەڭ جوعارعى مولشەرىندە بەلگىلەنەدى.
ەگەر ءبىر اي ىشىندە مىندەتتى زەينەتاقى جارنالارى ءبىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى.
وسىلايشا مىندەتتى زەينەتاقى جارنالارى نەعۇرلىم تۇراقتى جانە تولىق كولەمدەاۋدارىلاتىن بولسا، زەينەت جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.
ءوز كەزەگىندە ازاماتتىڭ جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدەگى ورتاشا ايلىق تابىسىنا بايلانىستى بولادى.