ۆيسە-پرەمەر – ۇلتتىق ەكونوميكا ءمينيسترى سەرىك جۇمانعارين ۇكىمەت، ۇلتتىق بانك جانە قارجى نارىعىن رەتتەۋ اگەنتتىگىنىڭ 2026–2028 جىلدارعا ارنالعان ماكروەكونوميكالىق تۇراقتاندىرۋ جانە حالىقتىڭ ءال-اۋقاتىن جاقسارتۋعا باعىتتالعان بىرلەسكەن جاڭارتىلعان باعدارلاماسىن تانىستىردى، دەپ حابارلايدى aqshamnews.kz
سەرىك ءجۇمانعاريننىڭ ايتۋىنشا، بۇل باعدارلاما قازاقستاندىقتاردىڭ ناقتى تابىسىن ارتتىرۋعا كومەكتەسەدى.
ءوندىرىستىڭ ءوسۋى ەسەبىنەن تابىستى ۇلعايتۋ
جۇمانعارين باعدارلامانىڭ باسىم باعىتى – ەكونوميكانىڭ ساپالى ءارى تۇراقتى ءوسۋىن قامتاماسىز ەتۋ جانە ينفلياسيانى تومەندەتۋ ارقىلى حالىقتىڭ ناقتى تابىسىن كوتەرۋ ەكەنىن اتاپ ءوتتى. ول قازاقستان ەكونوميكاسىنىڭ ءوسىپ جاتقانىن ەسكە سالدى. ماسەلەن، 2025 جىلدىڭ 10 ايىندا ەكونوميكا 6،4% ارتقان، ناقتى سەكتورداعى ءوسىم 8،2%، قىزمەت كورسەتۋ سالاسى 5،3% بولعان.
جەتىستىككە باعا بەرۋدىڭ جاڭا تاسىلدەرى
2026–2028 جىلدارى ۇكىمەت ەكونوميكانى جىل سايىن 5% دەڭگەيىندە ۇلعايتۋدى جوسپارلاپ وتىر، الايدا باستى نازار ءجىو قۇرىلىمىنداعى سالالاردىڭ جاي عانا وسۋىنە ەمەس. ءوسىمنىڭ قامتاماسىز ەتىلۋىندە ادام كاپيتالى، نەگىزگى كاپيتال، تابيعي رەسۋرستار، ەڭبەك ونىمدىلىگى جانە تەحنولوگيالار سياقتى ماڭىزدى فاكتورلاردىڭ ۇلەسى ەسكەرىلەتىن بولادى.
– وسىعان بايلانىستى الەۋەتتى جىو-گە قاراي ەكونوميكالىق ءوسىمدى تالداپ ءبولۋ وزەكتى بولا تۇسەدى. ءوسىمنىڭ ەڭ ماڭىزدى فاكتورى – «جيىنتىق ونىمدىلىك». ول ەكونوميكالىق ءونىم جاساۋ بارىسىندا ەڭبەك پەن كاپيتال سياقتى ءوندىرىس فاكتورلارىن قانشالىقتى ءتيىمدى پايدالانعانىن كورسەتەدى، – دەدى سەرىك جۇمانعارين.
ونىڭ ايتۋىنشا، 2001–2024 جىلدار ارالىعىندا وسى فاكتوردىڭ ەكونوميكا وسىمىنە قوسقان ورتاشا ۇلەسى 2،4 پايىزدىق پۋنكتتى قۇراعان. كاپيتالدىڭ ۇلەسى ورتاشا ەسەپپەن 1،8 پ.پ.، ال ەڭبەكتىڭ ۇلەسى – 1،3 پ.پ.
– باسىمدىق ۇزاق مەرزىمدى وندىرىستىك الەۋەتتى ەڭبەك ونىمدىلىگىن ارتتىرۋ، ءتيىمدى جۇمىسپەن قامتۋدى كۇشەيتۋ جانە كاپيتالدىڭ تەحنولوگيالىق دەڭگەيىن جوعارىلاتۋ ارقىلى ۇلعايتۋ بولادى. بۇل ءوز كەزەگىندە ءجىو ءوسىمى مەن جالاقى ءوسىمى اراسىنداعى ايىرماشىلىقتى بىرتىندەپ ازايتادى، – دەپ سەنەدى ۆيسە-پرەمەر جۇمانعارين.
ول جاڭا تاسىلدەردىڭ ارقاسىندا قازاقستاندىقتاردىڭ ناقتى تابىسى ينفلياسيادان 2–3% جىلدام وسەتىنىن ايتتى.