انا ءولىمى 2021 جىلمەن سالىستىرعاندا 3 ەسەگە تومەندەگەن
قازاقستاندىقتاردىڭ ورتاشا ءومىر ءسۇرۋ ۇزاقتىعى العاش رەت 74،4 جاسقا جەتتى. ءومىر ءسۇرۋ ۇزاقتىعىنىڭ وسۋىنە ەكونوميكانىڭ دامۋى، الەۋمەتتىك ءال-اۋقات، ونىڭ ىشىندە دەنساۋلىق ساقتاۋدىڭ دامۋى، سونداي-اق حالىقتىڭ سالاماتتى ءومىر سالتىن ۇستانۋى سياقتى فاكتورلار اسەر ەتەدى. بۇل تۋرالى دەنساۋلىق ساقتاۋ مينيسترلىگى مالىمدەدى، دەپ حابارلايدى Almaty-akshamy.kz.
مينيسترلىكتىڭ مالىمەتتەرىنە قاراعاندا، ەل باسشىلىعى قولداۋىنىڭ ارقاسىندا رەسپۋبليكادا جوعارى تەحنولوگيالىق مەديسينالىق قىزمەتتەردى، اۋىل مەديسيناسىن، دەنساۋلىق ساقتاۋ وبەكتىلەرىنىڭ ينفراقۇرىلىمىن دامىتۋ جونىندەگى جۇمىس كۇشەيتىلدى، دەنساۋلىق ساقتاۋ جۇيەسىنىڭ پروفيلاكتيكالىق باعىتتىلىعى قامتاماسىز ەتىلدى، اۋىل تۇرعىندارى ءۇشىن پروفيلاكتيكالىق تەكسەرۋلەر ەنگىزىلدى، بالالاردى پروفيلاكتيكالىق تەكسەرۋ پاكەتتەرى كەڭەيتىلدى، ونكولوگيالىق جانە گەماتولوگيالىق اۋرۋلارعا كۇدىك تۋىنداعان كەزدە تەكسەرۋلەر جەدەلدەتىلدى. جەدەل مەديسينالىق كومەك قىزمەتى 1 367 بىرلىك اۆتوكولىك ساتىپ الۋ جولىمەن كۇشەيتىلدى، بۇل ەل حالقىنا شۇعىل جانە جەدەل مەديسينالىق كومەك كورسەتۋ كەزىندە «التىن ساعات» قاعيداتىنىڭ ساقتالۋىن قامتاماسىز ەتۋگە مۇمكىندىك بەردى.
كولىك مەديسيناسى جانداندى، 77 مىڭنان استام تۇرعىنعا مەديسينالىق كومەك كورسەتكەن «جاردەم» جانە «سالاماتتى قازاقستان» 2 مەديسينالىق پويىزىنىڭ جۇمىسى قايتا جانداندى. شالعايداعى اۋىلدىق ەلدى مەكەندەردە قولدا بار 49 جىلجىمالى مەديسينالىق كەشەنگە مەديسينالىق كومەكتىڭ قولجەتىمدىلىگىن ارتتىرۋ ماقساتىندا قوسىمشا 100 زاماناۋي جمك ساتىپ الىندى، 2022 جىلى جمك قىزمەتتەرىمەن 3307 ەلدى مەكەن قامتىلدى، اۋىل تۇرعىندارىنا 1 820 833 ەمدەۋ-دياگنوستيكالىق قىزمەت كورسەتىلدى، 149 326 ناۋقاس انىقتالدى. جوعارى تەحنولوگيالىق مەديسينالىق قىزمەتتەردى قارجىلاندىرۋ كولەمى 3 ەسە، مەديسينالىق وڭالتۋ جانە كونسۋلتاسيالىق-دياگنوستيكالىق كومەك 11 ەسە، ونىڭ ىشىندە قىمبات كورسەتىلەتىن قىزمەتتەر 5 ەسە ۇلعايدى. جوعارىدا كورسەتىلگەن شارالاردى ىسكە اسىرۋ ناتيجەسىندە ەلىمىزدە دەنساۋلىق ساقتاۋدىڭ نەگىزگى مەديسينالىق-دەموگرافيالىق كورسەتكىشتەرىنىڭ وڭ سەرپىنى بايقالادى.
«2022 جىلدىڭ قورىتىندىسى بويىنشا قر-دا جالپى ءولىم-جىتىم كورسەتكىشى 29%-عا تومەندەپ، 1000 تۇرعىنعا شاققاندا 6،77 قۇرادى. قان اينالىم جۇيەسى اۋرۋلارىنان بولاتىن ءولىم-جىتىم 32،7%-عا، وبىردان – 7،9%-عا، جاراقاتتان – 5،3%-عا تومەندەدى. انا ءولىمى 2021 جىلمەن سالىستىرعاندا 3 ەسەگە تومەندەپ، 100 مىڭ ءتىرى تۋعاندارعا شاققاندا 17 قۇرادى، سابيلەر ءولىم-جىتىمى 9%-عا تومەندەپ، 1000 ءتىرى تۋعاندارعا شاققاندا 7،68 قۇرادى. حالىق دەنساۋلىعى كورسەتكىشتەرىندەگى وڭ وزگەرىستەر ءومىر ءسۇرۋ ۇزاقتىعىنىڭ وسۋىنە اسەر ەتتى جانە تاريحي ماڭىزعا – 74،44 جاسقا قول جەتكىزۋدىڭ كەپىلى بولدى، ول پاندەمياعا دەيىنگى ءوسۇ دەڭگەيىنەن 1،26 جاسقا اسىپ ءتۇستى، ال 2019 جىلى ول – 73،18 جاستى قۇرادى»،- دەپ مالىمدەدى دسم وكىلدەرى.