بارلىق رولدەردى جاسوسپىرىمدەر ورىندايدى
الماتىدا ۆ.جەلەزنياكوۆتىڭ بالالار مەن جاسوسپىرىمدەر اراسىنداعى بۋللينگ ماسەلەسىن باياندايتىن «چۋچەلو» پەساسى بويىنشا قويىلىمنىڭ كورسەتىلىمى ءوتتى، دەپ حابارلايدى Almaty-akshamy.kz.
وڭىرلىك كوممۋنيكاسيالار قىزمەتى الاڭىنداعى «يگرا» بالالار تەاترىنىڭ شىعارماشىلىق توبى قويىلىم يدەياسىنىڭ قايدان شىققانىن جانە اتالعان سپەكتاكلدەگى جۇمىستىڭ قالاي جۇرگىزىلگەنىن ايتىپ بەردى.
قويىلىمدا بالالاردىڭ دا ەرەسەكتەردىڭ دە رولدەرىن ءجاسوسپىرىم ارتىستەر سومدايدى. تەاتردىڭ نەگىزىن سالۋشىلار بۋللينگ تاقىرىبىن وتە وزەكتى دەپ ساناپ، بىرنەشە مىسال كەلتىردى.
«ءبىز ءۇشىن بالالاردى قورعاۋ ماسەلەسىن كوتەرۋ وتە ماڭىزدى. «چۋچەلو» ارقىلى ءبىز كورەرمەنگە وي سالامىز. «يگرا» تەاتر مەكتەبىنىڭ جەتەكشىسى رەتىندە مەنىڭ مىندەتىم – جاسوسپىرىمدەر مەن جاستاردىڭ وسى ماسەلەگە نازارىن اۋدارتۋ»، – دەپ ءبولىستى تەاتر جانە كينو اكتەرى، «يگرا» بالالار تەاترى مەكتەبىنىڭ نەگىزىن قالاۋشى جانە جەتەكشىسى راۋف حابيبۋللين.
سپيكەر بۇل قويىلىمدى قويۋ رەجيسسەر ءارى ۇستاز، تەاتر جانە كينو اكتەرى رۋستام سافاروۆتىڭ يدەياسى ەكەنىن اتاپ ءوتتى.
«بىزدە جاسوسپىرىمدەردەن جاقسى كوماندا جينالدى. جۇمىس بارىسىندا ءبىز ۆلاديمير جەلەزنيكوۆتىڭ پەساسىن بىرگە وقىدىق. ول سوناۋ كەڭەس زامانىندا جازىلعانىمەن، ونى وقىپ، جاسوسپىرىمدەرمەن تالقىلاي كەلە، بۋللينگ ماسەلەسىنىڭ بۇگىنگى كۇندە دە وزەكتى ەكەنىنە كوزىمىز جەتتى. سپەكتاكلدى التى ايدا قويدىق. شىنىمدى ايتسام، ناتيجەنىڭ مۇنشالىقتى قىزىق بولاتىنىن، ءار ءتۇرلى جاستاعى كورەرمەندەردىڭ جۇرەگى مەن ساناسىنا جەتەتىنىن كۇتپەدىم»، – دەيدى ر.سافاروۆ.
سپەكتاكل قويۋشىلارى بالالار مەن جاسوسپىرىمدەردىڭ ماسەلەلەرىن سولاردىڭ تىلىندە ايتۋ كەرەك دەيدى.
«بارلىق رولدەردى – بالالاردى دا، ەرەسەكتەردى دە 13-14 جاس ارالىعىنداعى جاسوسپىرىمدەر ورىندايدى. بۇل ماسەلە جاسوسپىرىمدەردىڭ تىلىندە ايتىلسا، كورەرمەنگە نەعۇرلىم تەرەڭىرەك جانە تۇسىنىكتى جەتەدى. ماتەريالدىڭ باياعىدا جازىلعانىنا، قىرىق جىل ءوتىپ كەتكەنىنە قاراپ، بىرەۋلەردە «نەگە بۇل ماتەريالدى الىپ جاتىرسىڭ؟» دەگەن سۇراق تۋىنداۋى مۇمكىن، بىردەن ايتايىن، ءبىز ەشتەڭەنى وزگەرتكەن جوقپىز. ونىڭ نەگىزىن وزگەرتپەي، اڭگىمەدە قالاي جازىلسا، سولاي ساحنالادىق. بۇل تاقىرىپ سول كەزدە دە، قازىرگى تاڭدا دا وتە وزەكتى ەكەنىن كورسەتەدى»، - دەپ قوستى ر.سافاروۆ.
بۇگىنگى تاڭدا تەاتر پسيحولوگتارمەن جۇمىس جاساۋدا جانە مەكتەپتەپتەگى جاسوسپىرىمدەردىڭ، اتا-انالاردىڭ، مۇعالىمدەردىڭ جانە ت.ب. نازارىن اۋدارۋدى جوسپارلاپ وتىر. سونىمەن، قويىلىمنىڭ كورسەتىلىمىندە كورەرمەندەر اراسىندا بالالار پسيحولوگى، مەكتەپتەردەگى داعدارىستىق جاعدايلاردى شەشۋ جونىندەگى مامان اناستاسيا ستەبليانكو بولدى، ول تەاترعا بىرلەسىپ جۇمىس ىستەۋدى ۇسىندى.
«قويلىمدى كورىپ، بۋللينگتى الدىن الۋدىڭ جاقسى ءتاسىلى ەكەنىن ءتۇسىندىم، ويتكەنى قويىلىم بۋللينگتىڭ قالاي باستالاتىنىن، قۇربانى قانداي كەزەڭدەردەن وتەتىنىن جاقسى كورسەتەدى. كوبىندە بۋللينگتىڭ باستى سەبەبى ىشكى، وتباسىلىق ماسەلەلەر. ءقازىر ءبىز «چۋچەلو» سپەكتاكلىن جاسوسپىرىمدەرگە كورسەتىپ، بۇل ماسەلەنى پروفيلاكتيكالىق جولمەن شەشۋ ءۇشىن قالاداعى مەملەكەتتىك مەكتەپتەردىڭ بىرىمەن كەلىسسوزدەر جۇرگىزىپ جاتىرمىز»، - دەپ ءبولىستى ول.
دەسەك تە، بۇل قوعامداعى ماڭىزدى، الەۋمەتتىك ماسەلەلەردى كوتەرىپ وتىرعان تەاتر قورىنداعى العاشقى جانە سوڭعى قويىلىم ەمەس. «يگرا» تەاترىنىڭ كورەرمەندەرىن ەسكەرە وتىرىپ، تاقىرىپتار نەگىزىنەن بالالار مەن جاسوسپىرىمدەردىڭ ماسەلەلەرىنە قاتىستى. مامىر ايىندا «سكازكي سكۆوز كامني» قويىلىمىنىڭ پرەمەراسى كۇتىلۋدە، وندا باستى كەيىپكەرلەر ۇلكەندەردىڭ كومەگىنسىز ءوز ماسەلەلەرىن شەشۋگە تىرىساتىن ءجاسوسپىرىم قىزدار جايلى بولادى.