قازاقستاندىق وتباسىلاردىڭ 60 پايىزدان استامى ەنەرگيانى ۇنەمدەيتىن شامداردى پايدالانادى.
بۇنداي دەرەكتەردى ۇلتتىق ستاتيستيكا بيۋروسى كەلتىرىپ وتىر، دەپ حابارلايدى Almaty-akshamy.kz.
ەرسۇلتان كەڭەسبەك 2014 جىلدان بەرى جارىقديودتى شامداردى پايدالانۋعا كوشكەن. ايتۋىنشا، بۇل ەسكىلەرىنە قاراعاندا ەنەرگيانى جاقسى ۇنەمدەيدى. ەسەسىنە جارىقتى دا جاقسى بەرەدى. باستىسى كوممۋنالدىق شىعىندار ازايعان.
«وتە ۇنەمدى. ايىنا كومۋسلۋگا دەيمىز عوي، سول بويىنشا جارىق 1 ايعا وسى 2 بولمەلى ۇيگە، مينيمالنىي 1800 تەڭگە ما، سولاي عانا سۆەتكە كەتىپ جاتىر بىزدە»، - دەيدى ەرسۇلتان كەڭەسبەك.
اسپالى شامدار ساۋداسىمەن اينالىساتىن رۋسلان تىلەيەۆتىڭ سوزىنشە، سوڭعى جىلدارى قازاقستاندىقتاردىڭ دەنى ەنەرگيانى ۇنەمدەۋگە كوشكەن. ياعني، كۇندەلىكتى تۇرمىستا جارىقديودتى شامداردى قولدانۋعا تىرىسادى. ونىڭ باستى ەرەكشەلىگى – ءقاۋىپسىز ءارى ۇزاق مەرزىمگە شىداس بەرەدى.
«2000 جىلداردىڭ باسىندا بۇرىنعى قاراپايىم ۆولفرام قىلى بار قىزدىرۋ شامدارىنىڭ ورنىنا ليۋمينەسەنتتى شامدار كەلدى. ولاردىڭ قۇرامىندا سىناپ بولاتىن. ياعني حيميالىق ەلەمەنت. ول ارينە ادام ءۇشىن ءقاۋىپتى ەدى. جارامسىز بولىپ قالسا قاراپايىم قوقىس جاشىگىنە لاقتىرا سالۋعا بولمايدى. ارنايى كونتەينەرلەرگە عانا سالۋ كەرەك. ال ءقازىر نارىققا ءقاۋىپسىز، ءارى جارىقتى جاقسى بەرەتىن ديودتى شامدار كەلدى»، - دەيدى كاسىپكەر رۋسلان تىلەيەۆ.
قازاقستاندىقتاردىڭ جارىقتى ۇنەمدەيتىن ديودتى شامدارعا بىرتىندەپ كوشىپ جاتقانىن جۇرگىزىلگەن تالداۋ ناتيجەلەرى دە كورسەتىپ وتىر. ۇلتتىق ستاتيستيكا بيۋروسىنىڭ مالىمەتتەرىنە ساي ەلدەگى ءۇي شارۋاشىلىقتارىنىڭ 65 پايىزى ەنەرگيا ۇنەمدەيتىن شامداردى پايدالانادى. ال حالىقتىڭ 28،9% ءالى دە بولسا سول بۇرىنعى ۆولفرام قىلى بار قىزدىرۋ شامدارىن قولدانىپ ءجۇر. دەنى اۋىلدىق جەردە.
قازاقستاندىقتار پايدالاناتىن شامدار
ەنەرگيا ۇنەمدەيتىن شامدار - 65%
قىزدىرۋ شامدارى – 28،9%
اۋىل تۇرعىندارى – 42،8%
قالا تۇرعىندارى – 22،9%
ەنەرگيا ۇنەمدەيتىن شامدار ءسىزدىڭ كوممۋنالدىق شىعىنىڭىزدى ازايتقانىمەن، ءوزىنىڭ قۇنى قىمباتتاۋ. بۇنداي شامدى ءوندىرۋدىڭ ءوزى ارزانعا تۇسپەيدى. سوندىقتان ءقازىر الەم ەلدەرى ونىڭ وڭتايلى تاسىلدەرىن ويلاپ تابۋمەن اينالىسىپ جاتىر. ولاردىڭ قاتارىندا وتاندىق عالىمدار دا بار.
ەۋرازيا ۇلتتىق ۋنيۆەرسيتەتىنىڭ فيزيكا-تەحنيكالىق فاكۋلتەتىنىڭ ماماندارى ليۋمينوفوردى سينتەزدەۋدىڭ تىڭ تەحنولوگياسىن الەمدە ءبىرىنشى بولىپ اشقان. بۇل ۇنتاق ەشبىر ەلەكتر ەنەرگياسىنا قوسىلماي جارىق بەرە الادى. ول ءۇشىن 24 ساعاتتىڭ ىشىندە ارنايى پەشتە جوعارى تەمپەراتۋرادا سينتەزدەۋ قاجەت. ال قازاقستاندىق عالىمدار ۇسىنىپ وتىرعان تەحنولوگيا ۋاقىتتى الدەقايدا ۇنەمدەيدى.
ءقازىر عالىمدار اشقان جاڭالىقتارىن پاتەنتتەۋگە كىرىسكەن. ايتۋلارىنشا، وسى تەحنولوگيامەن جارىق شامداردىڭ جاپپاي ءوندىرىسىن قولعا السا، قۋاتتى ايتارلىقتاي ۇنەمدەۋگە بولادى. ءتىپتى ەلەكتر ەنەرگياسىن وندىرەتىن جىلۋ ەلەكتر ورتالىعىنىڭ دا كومەگىنەن باس تارتۋ مۇمكىندىگى تۋادى، دەيدى عالىمدار.