قازاقستاندىقتاردىڭ 57،8%-ى 2024 جىلدىڭ 6 قازانىندا وتەتىن رەفەرەندۋمعا قاتىسۋدى جوسپارلاپ وتىر، ال 59،3%-ى اەس قۇرىلىسىنا قولداۋ ءبىلدىردى. بۇل مالىمەتتەر قوعامدىق ساياسات ينستيتۋتى جۇرگىزگەن الەۋمەتتانۋلىق زەرتتەۋ ناتيجەلەرىندە ۇسىنىلدى.
قوعامدىق ساياسات ينستيتۋتى قازاقستاندا 2024 جىلى وتەتىن اتوم ەلەكتر ستانسياسىن سالۋ جونىندەگى رەفەرەندۋمعا تۇرعىنداردىڭ كوزقاراسىن انىقتاۋ ماقساتىندا ەكسپرەسس-ساۋالناما وتكىزدى. زەرتتەۋگە ەلدىڭ ءار ايماعىنان 2000-نان استام تۇرعىن قاتىستى. ولاردىڭ قاتارىندا جاستار، زەينەتكەرلەر، كوپبالالى وتباسىلار جانە ءتۇرلى الەۋمەتتىك توپ وكىلدەرى بولدى.
ينستيتۋت ديرەكتورى مادينا نۇرعالييەۆانىڭ ايتۋىنشا، رەسپوندەنتتەردىڭ 74،6%-ى رەفەرەندۋم تۋرالى حاباردار ەكەندىگىن بىلدىرگەن. ولاردىڭ 57،8%-ى رەفەرەندۋمعا قاتىسۋدى جوسپارلاپ وتىر. سونىمەن قاتار، 59،3%-ى قازاقستاندا اتوم ەلەكتر ستانسياسىن سالۋعا قولداۋ كورسەتىپ، وڭ پىكىر بىلدىرگەن.
«زەرتتەۋ ناتيجەلەرى كورسەتكەندەي، حالىقتىڭ باسىم بولىگى الداعى رەفەرەندۋم تۋرالى بىلەدى جانە وعان بەلسەندى قاتىسۋدى جوسپارلاپ وتىر. ازاماتتاردىڭ بۇل ماسەلە بويىنشا جوعارى دەڭگەيدە حاباردار بولۋى اتوم ەلەكتر ستانسياسى قۇرىلىسىنا قاتىستى قوعامنىڭ ۇلكەن قىزىعۋشىلىق ءبىلدىرىپ وتىرعانىن كورسەتەدى. شەشىم قابىلداۋ پروسەسىندە حالىقتىڭ ءاربىر پىكىرى ەسكەرىلىپ، اشىقتىقتى قامتاماسىز ەتۋ ماڭىزدى،» – دەپ اتاپ ءوتتى نۇرعالييەۆا.
ساۋالناما بارىسىندا «face-to-face» ءادىسى قولدانىلدى. قوعامدىق ساياسات ينستيتۋتىنىڭ باس ساراپشىسى مەدەت ءومىرزاقوۆ بۇل ءادىس دەرەكتەردى جيناۋدىڭ ەڭ ءدال تاسىلدەرىنىڭ ءبىرى ەكەنىن اتاپ ءوتتى. ساۋالناما قاعازسىز، اۆتوماتتاندىرىلعان تۇردە جۇرگىزىلىپ، ءاربىر سۇحباتتىڭ ۇزاقتىعى، رەسپوندەنتتىڭ رەاكسياسى جانە GPS-كوورديناتتارى تىركەلىپ وتىردى. بۇل دەرەكتەردىڭ ساپاسىن ارتتىرىپ، ساۋالنامانىڭ دالدىگىن باقىلاۋعا كومەكتەستى.
قوعامدىق ساياسات ينستيتۋتىنىڭ ساراپشىلارى مۇنداي الەۋمەتتىك زەرتتەۋلەر قازاقستاندىقتاردىڭ ماسەلەنى تەرەڭىرەك ءتۇسىنىپ، نەگىزدەلگەن شەشىم قابىلداۋىنا كومەكتەسەتىنىن اتاپ ءوتتى. ساۋالناما ق ر زاڭناماسىنا سايكەس وتكىزىلدى.