بۇگىنگى كۇندە قازاقستاندا 37 كاسىپ بويىنشا داعدىلاردى راستاي الاتىن 3 كاسىپتىك بىلىكتىلىكتى تانۋ ورتالىعى اككرەديتتەلگەن.
كاسىپتىك بىلىكتىلىكتى تانۋ ءراسىمى ءاربىر ازامات ءۇشىن ەڭبەك نارىعىندا باسەكەگە قابىلەتتىلىگىن ارتتىرۋ جانە جاڭا مانساپتىق پەرسپەكتيۆالاردى اشۋ ءۇشىن ءوزىنىڭ ءبىلىمى مەن داعدىلارىن رەسمي تۇردە راستاۋعا مۇمكىندىك بەرەدى، دەپ حابارلايدى aqshamnews.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
بىلىكتىلىكتى تانۋ كاسىپتىك ستاندارتتار نەگىزىندە جۇزەگە اسىرىلادى جانە ۇمىتكەردىڭ بەلگىلى ءبىر كاسىپتىڭ تالاپتارىنا سايكەستىگىن باعالايدى.
بارلىعى ءوز داعدىلارىن راستاۋعا بولاتىن كاسىپتەر تىزىلىمىنە ەكونوميكانىڭ ءتۇرلى سالالارىنان 500-دەن استام كاسىپ كىرەدى. بۇل تىزىمگە كەلەشەكتە ەڭبەك نارىعىنىڭ زاماناۋي تالاپتارىنا سايكەس كەلەتىن جاڭا ماماندىقتاردى ەنگىزۋ جوسپارلانۋدا.
قازىرگى جۇمىس ىستەپ تۇرعان ءۇش كاسىپتىك تانۋ ورتالىعى تۋريزم جانە قوناقجايلىلىق (17 كاسىپ) پەن اقپاراتتىق تەحنولوگيالار (20 كاسىپ) سالالارىنا ماماندانعان. ازاماتتارعا ىڭعايلى بولۋ ءۇشىن بارلىق قاجەتتى راسىمدەردى Career Enbek سيفرلىق پلاتفورماسىندا ونلاين وتۋگە بولادى.
اككرەديتتەلگەن ۇيىمدار جەلىسىن كەڭەيتۋ بويىنشا بەلسەندى جۇمىس جۇرگىزىلۋدە. وسىلايشا، اككرەديتتەۋگە ءتيىستى دايىندىق راسىمدەرىن كاسىپتىك بىلىكتىلىكتى تانۋدىڭ تاعى 20 الەۋەتتى ورتالىعى جۇرگىزەدى.