ق ر عىلىم جانە جوعارى ءبىلىم مينيسترلىگىنىڭ قولداۋىمەن عىلىم قورى حيميا سالاسىنداعى عىلىمي جوبالاردىڭ تۇساۋكەسەرىن ۇيىمداستىرىپ، ءال-فارابي اتىنداعى قازاق ۇلتتىق ۋنيۆەرسيتەتىندە عالىمدار مەن ينۆەستورلار جانە كاسىپكەرلەر باس قوستى.
«حيميا ونەركاسىبى بويىنشا تەحنولوگيالاردى كوممەرسيالاندىرۋ رەاكتورى» ديالوگ الاڭىندا قاتىسۋشىلار عىلىمي جوبالاردى ەنگىزۋ جانە يننوۆاسيالاردى كوممەرسيالاندىرۋ ماسەلەلەرىن ورتاعا سالدى، دەپ حابارلايدى aqshamnews.kz عىلىم جانە جوعارى ءبىلىم مينيسترلىگىنە سىلتەمە جاساپ.
اۋقىمدى كەزدەسۋگە ق ر عجبم عىلىم كوميتەتىنىڭ ءتوراعاسى عالىمجان جانقۋاتوۆ، «عىلىم قورى» اق باسقارما ءتوراعاسى كاميل اقاتوۆ، ءال-فارابي اتىنداعى قازۇۋ باسقارما ءتوراعاسىنىڭ ورىنباسارى – ءبىرىنشى پرورەكتور ەركىن دۇيسەنوۆ، الماتى، اتىراۋ، قاراعاندى جانە وزگە دە وڭىرلەردەگى ۋنيۆەرسيتەت عالىمدارى، تانىمال بيزنەسمەندەر قاتىستى.
كەزدەسۋ ماقساتى – بيزنەس وكىلدەرىن ۋنيۆەرسيتەت عالىمدارى ازىرلەگەن يننوۆاسيالىق جوبالارمەن تانىستىرۋ، عىلىم مەن بيزنەستى بىرىكتىرۋ، عىلىمي جوبالاردى نارىققا شىعارۋ، كوممەرسيالاندىرۋ باعىتىنداعى تۇيتكىلدى ماسەلەلەردى قاراستىرۋ.
جالپى، عىلىمي يننوۆاسيالاردى ەنگىزۋ ءۇشىن بەرىك سەرىكتەستىك قۇرا وتىرىپ، عىلىم مەن بيزنەستى ءتيىمدى بىرىكتىرەتىن كوممەرسيالاندىرۋ رەاكتورى اياسىندا وتكەن شارالار قورىتىندىسى بويىنشا 14-تەن استام عىلىمي جوبا قارجىلاندىرۋعا يە بولدى.
سولاردىڭ ءبىرى، كوممەرسيالاندىرۋ رەاكتورىندا ۇسىنىلعان وسىمدىك مايىن رەگەنەراسيالاۋ جونىندەگى جوبا قارجىلاندىرۋدى الىپ، بيزنەس پەن س. سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ عالىمدارىمەن سەرىكتەستىكتە جاڭا ءوندىرىستى ىسكە قوستى. وسىمدىك مايىن وڭدەيتىن جاڭا سەح عىلىم مەن بيزنەستىڭ تابىستى ىنتىماقتاستىعىنىڭ ناتيجەسى بولدى.
جيىندا ق ر عجبم عىلىم كوميتەتىنىڭ ءتوراعاسى عالىمجان جانقۋاتوۆ ديالوگ الاڭى پەرسپەكتيۆالىق مامىلەلەر جاساسۋعا جانە جوبالاردى كوممەرسيالاندىرۋ جۇمىستارىن جۇزەگە اسىرۋعا مۇمكىندىك بەرەتىنىن اتاپ ءوتتى.
ءوز كەزەگىندە قازۇۋ-دىڭ پرورەكتورى ەركىن دۇيسەنوۆ ءسوز سويلەپ، بۇگىندە جوو الدىندا عىلىمدى باسقارۋ ساپاسىن جاقسارتۋ، ۋنيۆەرسيتەت عىلىمىن دامىتۋ، عىلىمي قىزمەتكەرلەر سانىن كوبەيتۋ مىندەتى تۇرعانىن ايتتى.
«عىلىم قورى» اق باسقارما ءتوراعاسى كاميل اقاتوۆ جۇرگىزىلگەن جۇمىستاردىڭ ناتيجەلەرىمەن ءبولىستى.
ءىس-شارا بارىسىندا عالىمدار ينۆەستورلارعا عىلىمي ازەرلەمەلەرىن تانىستىردى. اتاپ ايتقاندا، كومىردىڭ شاڭ ءتارىزدى فراكسياسىن كەشەندى پايدالانۋ، قۇرامىندا كۇكىرتسۋتەگى بار گازداردى تازارتۋ، مۇزعا قارسى زاتتارعا ارنالعان ناتريي فورماتىن الۋ، مال شارۋاشىلىعى قالدىقتارىنان كەراتين گيدروليزاتتارىن ءوندىرۋ جانە وزگە دە يننوۆاسيالىق جوبالار بار