قىلمىسكەرلەر بانكتىك شوتتاردى، سونداي-اق وففشورلىق شوتتار مەن كريپتوۆاليۋتا ءامياندارىن پايدالانعان.
قازاقستاندىق جانە ۋكرايندىق كيبەرپوليسەيلەر الاياقتاردىڭ Call-ورتالىعىن جويدى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
«قازاقستان رەسپۋبليكاسى ءىىم كيبەرقىلمىسقا قارسى كۇرەس ورتالىعىنىڭ قىزمەتكەرلەرى ۋكراينا ۇلتتىق پوليسياسىنداعى ارىپتەستەرىمەن بىرلەسكەن جەدەل ءىس-شارالاردى وتكىزۋ كەزىندە دنەپر قالاسىنداعى الاياقتاردىڭ سall-ورتالىعى قىزمەتىن توقتاتتى.
قازاقستان ازاماتتارىنا قاتىستى ينتەرنەت-الاياقتىقپەن اينالىساتىن ترانسۇلتتىق قىلمىستىق توپتىڭ ۇيىمداستىرۋشىلارى مەن مۇشەلەرى انىقتالدى. ولار قازاقستان ازاماتتارىنا تەلەفون سوعىپ، وزدەرىن بانكتەردىڭ، قۇقىق قورعاۋ ورگاندارىنىڭ قىزمەتكەرلەرى رەتىندە تانىستىرىپ، كۇدىكتى ترانزاكسيالار تۋرالى حابارلاپ، بەلگىسىز تۇلعالار ولاردىڭ ەسەپشوتتارىنا قول جەتكىزدى جانە ترانزاكسيالاردى توقتاتامىز دەگەن جەلەۋمەن كليەنتتەردى قارجىلىق مالىمەتتەردى بەرۋگە كوندىرگەن، ونلاين-نەسيەلەر الدىرعان. مۇنداي اقپاراتتى العان شابۋىلشىلار جابىرلەنۋشىلەردىڭ اقشاسىن قىلمىسكەرلەردىڭ باقىلاۋىنداعى ەسەپشوتتارعا اۋدارعان.
قىلمىستىق توپتى ۇيىمداستىرۋشىلار الاياق بايلانىس ورتالىعىنىڭ وپەراتورلارىن ىنتالاندىرىپ، قىلمىستىق جولمەن قول جەتكىزگەن سوماعا ءوسىماقى تولەپ وتىرعان»، - دەدى ق ر ءىىم كريمينالدىق پوليسيا دەپارتامەنتى كيبەرقىلمىسقا قارسى كۇرەس ورتالىعىنىڭ باستىعى جاندوس ءسۇيىنباي.
قىلمىسكەرلەر بانكتىك شوتتاردى، سونداي-اق وففشورلىق شوتتار مەن كريپتوۆاليۋتا ءامياندارىن پايدالانعان. ولار ارقىلى الاياقتىق قۇرباندارىنان ۇرلانعان اقشانىڭ بەلگىلى ءبىر پايىزىن قولما-قول اقشاعا اينالدىرىپ وتىرعان.
«بۇل رەتتە ۋكراينا تاراپى كۇدىكتىلەردىڭ دنەپروپەتروۆسك وبلىسىنداعى 13 تۇرعىلىقتى مەكەنجايىندا ءتىنتۋ جۇرگىزدى. جەدەل ىزدەستىرۋ شارالارى بارىسىندا 45 كومپيۋتەرلىك تەحنيكا، 24 ۇيالى تەلەفون، sim-كارتا جانە باسقا دا زاتتاي ايعاقتار تاركىلەندى. تاركىلەنگەن كومپيۋتەرلەردە قوڭىراۋ شالۋ كەزىندە ابونەنتتىك نومىرلەردى اۋىستىرۋعا ارنالعان باعدارلامالىق جاساقتاما بار ەكەنى انىقتالدى. وسى باعدارلامالاردىڭ جۋرنال فايلدارىن قاراۋ كەزىندە قازاقستاندىق وپەراتورلاردىڭ ابونەنتتەرىنىڭ نومىرلەرىنە الاياقتىق قوڭىراۋلار تاريحى انىقتالدى.
سونداي-اق، تاركىلەنگەن تەحنيكانى تەكسەرۋ بارىسىندا قازاقستان رەسپۋبليكاسى ازاماتتارىنىڭ جەكە دەرەكتەرى جانە قازاقستان رەسپۋبليكاسى ۇلتتىق بانكىنىڭ ەمبلەماسى بار دەرەكتەر كوزى تابىلدى. بۇل اقپاراتتى الاياقتار وزدەرىنىڭ شوتتارىنان اقشا جىمقىرۋ ءۇشىن فورد-قوڭىراۋ شالۋ ءۇشىن پايدالانعان»، - دەيدى سپيكەر.
ارنايى وپەراسيا بارىسىندا قىلمىستىق توپتىڭ ۋكراينا ازاماتتارى اراسىنان شىققان 32 مۇشەسى ۇستالدى. Call-ورتالىعى 40 ادامنان قۇرالعان. قازىرگى ۋاقىتتا ۋكراينا تاراپى قازاقستاندىق كيبەرپوليسيانىڭ كومەگى ارقىلى تەرگەۋ ارەكەتتەرى مەن جەدەل ىزدەستىرۋ ءىس-شارالارىن جۇرگىزىپ جاتىر. ولار قۇقىققا قايشى قىزمەتتىڭ بارلىق ءمان-جايلارىن، قوسىمشا ەپيزودتارىن، ىقتيمال قاتىسۋشىلارىن انىقتاۋعا، سونداي-اق وسى قىلمىستىق توپتىڭ قازاقستان ازاماتتارىنا كەلتىرگەن زالالىن انىقتاۋعا باعىتتالعان.