جاڭا جىل مەرەكەسىن اسىعا كۇتەتىن بالالار. اۋىرىپ، اۋرۋحاناعا تۇسكەن بالالار ءۇشىن بۇل مەرەكە، اسىرەسە، ماڭىزدى.
پرەزيدەنتتىڭ تاپسىرماسىنا سايكەس بالالاردى جاڭا جىلمەن قۇتتىقتاۋعا ەرەكشە كوڭىل ءبولىندى. بيىل الماتىدا ءداستۇرلى تۇردە مەكتەپتەردە، الەۋمەتتىك ورتالىقتاردا، بالالارعا بەيىمدەۋ جانە كومەك كورسەتۋ ورتالىقتارىندا بالالارعا ارنالعان شىرشالار، سونداي-اق ءحاوت ساناتىنداعى بالالار مەن مۇمكىندىگى شەكتەۋلى بالالارعا ارنالعان شىرشالار وتكىزىلدى.
الماتىدا بالالار جەدەل مەديسينالىق كومەك كورسەتۋ ورتالىعىنداعى 50 بالا قالا اكىمىنىڭ اتىنان جاڭاجىلدىق سىيلىقتار الدى. كىشكەنتاي ەمدەلۋشىلەردى قوعامدىق دەنساۋلىق ساقتاۋ باسقارماسىنىڭ باسشىسى يران شامەتەكوۆ قۇتتىقتادى، دەپ حابارلايدى Almaty-akshamy.kz.
ەم الىپ جاتقان بالالار ءۇشىن قوناقتاردىڭ كەلۋى توسىن سىي بولدى. بالالارعا سىيلىقتار تاراتىلىپ، تىلەكتەر ايتىلدى. ەمدەلۋشىلەردىڭ كوڭىل-كۇيى اپ-ساتتە كوتەرىلە ءتۇستى. ال جاقسى كوڭىل-كۇي دەنساۋلىق كەپىلى ەكەنى ءسوزسىز.
«ۇيگە، جاقىندارىڭىزعا ورالۋ ءۇشىن تەزىرەك ساۋىعىپ كەتۋدى تىلەيمىن. سەندەرگە زور دەنساۋلىق، قىزىقتى جاڭاجىلدىق دەمالىس پەن شىنايى قۋانىشتى ساتتەر تىلەيمىن»، - دەپ يران شامەتەكوۆ جاڭا جىلدى اۋرۋحانادا قارسى الۋى مۇمكىن بالالاردى قولدادى جانە مەديسينا قىزمەتكەرلەرىنە اتقارىپ جاتقان جۇمىسى ءۇشىن العىس ايتىپ، الداعى مەرەكەلەرىمەن قۇتتىقتادى.
«بالالاردى جاڭا جىلمەن قۇتتىقتاۋ جانە ولار ءۇشىن مەرەكە ۇيىمداستىرۋ – ءبىزدىڭ جىل سايىنعى ءداستۇرىمىز. سوڭعى ەكى جىل پاندەميانىڭ كەسىرىنەن مەرەكەلەۋدەن باس تارتۋعا تۋرا كەلدى. ال بيىل بالالارعا جاڭاجىلدىق مەرەكە سىيلادىق. اۋرۋحانادا 160-قا جۋىق بالا ەمدەلىپ جاتىر، وسى جولى ولارعا جاڭا جىل مەرەكەسىن وتكىزىپ جىبەرۋگە ەشتەڭە سەبەپ بولمايدى دەپ شەشتىك. بالالار جەدەل جاردەم ورتالىعىندا 13 كلينيكالىق بولىمشە بار. ءار بولىمشەدە بالالار ءۇشىن ەرەكشە شوۋ-باعدارلاماسى بار ەرتەڭگىلىكتەر ءوتتى»، - دەيدى بالالار شۇعىل مەديسينالىق كومەك كورسەتۋ ورتالىعىنىڭ باس دارىگەرى الىبەك سماعۇلوۆ.
ەسكە سالايىق، بالالار جەدەل مەديسينالىق كومەك كورسەتۋ ورتالىعى 0-18 جاس ارالىعىنداعى بالالارعا شۇعىل جانە جوسپارلى حيرۋرگيالىق كومەك كورسەتەدى. مۇندا ەمدەۋدىڭ يننوۆاسيالىق حيرۋرگيالىق ادىستەرى قولدانىلادى، كۇنىنە 300-دەن استام بالا اۋرۋحانانىڭ قابىلداۋ بولىمىنە جۇگىنەدى.
مۇندا حيرۋرگيالىق كومەك، تراۆماتولوگيا، ۋرولوگيا، نەفرولوگيا، بالالار نيەۆرولوگياسى، وفتالمولوگيا جانە توكسيكولوگيالىق كومەك كورسەتىلەدى. ورتالىقتا سونىمەن قاتار نەوناتالدى حيرۋرگيا ءبولىمى مەن تۋا بىتكەن پاتولوگياسى بار جاڭا تۋعان نارەستەلەردى كۇتۋگە ارنالعان رەانيماسيا ءبولىمى بار. ورتالىقتا ەلىمىزدىڭ تۇكپىر-تۇكپىرىنەن كۇيىك پەن ۇسىككە شالدىققان بالالار جەدەل جانە وڭالتۋ ەمىن الادى.